BIIRBEH.MN by Bataka

Өгүүллэг: Х.Болор-Эрдэнэ : Шөнийн цонхны яриа
Оруулсан admin on 2007-03-13 06:48:00 (7618 уншсан)

Шөнийн 23 цагийн орчимд есөн давхар байрнуудын дунд 1994 оны “Цох”-той төстэй мөнгөлөг саарал өнгийн машин хэн нэгнийг дуудан дуут дохиогоо чарлуулав. Тэр чимээнээр гурван давхарын улаан хөшигтэй цонхноос бүдэг гэрэл уцаарлах мэт улсхийн ассанаа төд удалгүй хөшиг ярагдаж хэн нэгний толгой цухасхийгээд алга боллоо. Харин өнөөх машин солиорсон мэт дохиогоо хангинуулсан хэвээр. Энэ тээртэй дуунд зарим нэг цонх доргих агаад зарим нь юу ч болоогүй янзтай чимээгүйхэн дүнсийнэ. Өнөөх улаан хөшигтэй цонхны эзэн нь гараад явчихав бололтой гэрэл унтарч улаан хөшиг айсан хүүхэд шиг улалзсаар харанхуйд ганцаар хоцорлоо. Харин чанх урдаас нь хөх саарал хөшигтэй цонх түүнийг үзэн ядах мэт цийлгэр хөх өнгөөр бүүдийгээд хүйтнээр хялайна.
Жирийн хүмүүсийн нэг өдрийн амьдрал ийнхүү амсхийх үед өөр нэгэн амьдрал сэрж, бие биедээ ховч хүүхнүүд шиг элдвийн зүйл ярилцан, зарим нь доогтойхон ягаарч байхад зарим нэг нь ичингүйрэн бүүдийнэ.
Азтай аль нэг цонхонд гэрэл асч амьдралын халуун дулаан өнгө, баяр хөөр гэрэлтэн салхивчнаас нь уур савсаж байхад зарим нь шалиг завхай, тэнэмэл эздээсээ ичсэндээ тээр цаана бүрсийнэ. Есөн давхрын энэ хэдэн цонх өөд өөдөөсөө ширтэлцсээр хэдийнэ хорь гаруй жилийг үджээ. Гурван давхарын цайвар ногоон хөшигтэй цонх эд нараасаа хамгийн хуучинсаг нь. Өглөө бүр нэгэн цагт гэрэлтэж, орой бүр нэгэн цагт харанхуйлах тэр ногоон хөшиг нэгэн хэвийн амьдралаа анзаарсан шинжгүй бас тэр бүхнээсээ огт зовсон шинжгүй. Түүний уйтгартай саарал хүрээг харж байсан улбар шар хөшигтэй ганган цонх:
-Хүүе, эрхэм ээ? Танд хэцүү биш байна уу гэж сонирхон асуув. Харин ногоон цонх түүнийг огт дуулаагүй мэт өнөөх л нам гүм хэвээрээ дүнсийсээр... Гэнэт долоон давхрын цэнхэр хөшигтэй цонхны цаанаас нижигнэсэн хүнд хөгжмийн ая цочтол хангинаж, хөршийнх нь цагаан хөшиг үл мэдэг чичирхийлэв. Энд тэндээс уцаарлах дуу гарч,
-Энэ яахаараа дандаа шөнө дөлөөр ингэж хангинуулдаг байна аа. Дэндүү эрээгүй юм.
-Хэлээд юүхэв, хэтэрхий заваан чимээтэй…
-Хамгийн гол нь тэр доргионыг нь тэсвэрлэхэд бэрх шүү гэхчилэн шуугиж гарлаа. Харин өнөөх сүрхий дуу чимээ хангинуулсан цонх шилээ цууртал хөхөрснөө,
-Хөршүүд минь, бухимдлаа гээд яах юм бэ? Хүүхдүүд ид шилжилтийн насан дээрээ байна шүү дээ гэв.
Харин энэ бүхнийг намуухан инээмсэглэн сонсож байсан ухаа ягаан хөшигтэй цонх саяхан угаасан шилээрээ шөнийн ододтой өрсөлдөх мэт гялсхийснээ,
-Та нар энэ таван давхарын хувцасгүй хатагтайг хараач. Тэр дахиад л нэг шилээ хагалуулчихаж гээд жуумалзав. Бараг хоёр жилийн турш доторх бульхайгаа олны нүдэнд дэлгэн хамаг дутагдлаа харуулаад сурчихсан өнөөх цонх,
-Хн…гэж ууртайхан ширвэснээ, энд жинхэнэ эр зоригтнууд амьдардаг юм. Эхнэр нь илүү хүчтэй юу, нөхөр нь илүү юү гэдгийг та нар мэдэх юм уу? Харин чиний наад гэмгүй ягаан хөшигний араас ямар ичгүүртэй дуу чимээ гардгийг бүгд л мэдэх байх шүү. гэж хүнгэнэв. Бүгдээрээ дор дороо инээд алдсанаа,
-Тэр ч үнэн шүү. Эднийхээс гардаг чимээ мөн ч олон хөшигний хормойг салхинд дэрвүүлсэн дээ гэлцлээ. Яг энэ мөчид ягаан хөшигний гүнээс эмэгтэй хүний тачаангуй дуу алдах сонсогдов. Бүгд хэрэгт дурлан тэр зүгт анхаарал тавина. Харин энэ үед бүгдийн анхаарлыг сарниулан:
-Өглөө ч нээгдэнэ гэж байхгүй шүү. Тэгээд бас ихэмсэг гэдгийг нь ээ хэмээн эрээн хөшигтэй хоёр давхрын цонх үглэхэд,
-Чи хэнийг хэлээд байна аа гэж ягаан цонх сонирхон асуув. Эрээн хөшигт:
-Яагаав, чиний дээд талын наад саарал хөшигтэй цонх чинь. Өвөл ч, зун ч нар оруулсангүй. Цонхных нь дунд амь тавьсан ялааны сэгнүүд тоосонд дарагдсаар бараг дөрвөн жил болж байна гэхэд сая л бүгд өнөөх саарал хөшиг рүү анхаарал хандуулав. Харин саарал хөшигний наана тоос даран бүүдийх цонх нь модон араамаа хяхтнуулан бүгтхэн хоолойгоо зассанаа,
-Уучлаарай, нөхөд өө. Миний саарал хөшигний ард хэн байдгийг би өөрөө ч мэдээгүй байна. Энэ тухай л бодсоор хэдэн жил боллоо. Хэн нэг нь энэ хөшгөнд хуруугаа ч болов хүргэх болов уу гэж мөн ч удаан хүлээлээ. Эзэн нь хоногийн 24 цагт нааш цааш холхиж тун хэцүү үнэртэй тамхи ханхлуулж байгаад л гараад явчихдаг юм. Царайг нь нэг харахсан гэж шогширсноо,
-Одоогоос дөрөв таван жилийн өмнө нэг эмэгтэй энэ хөшгийг татсан юм. Харин тэр их сайхан дуулдаг байсан юм шүү. Өнгө нь одоогийнх шиг саарал байгаагүй юм аа. Мөнгөлөг торго. Тэр үүнийгээ “Сарны өнгөтэй” гэж хэлж байсныг санаж байна. Гэхдээ эмэгтэй нэг удаа маш их уйлсан. Тэр өнөөх хөшгөндөө нулимсаа арчиж бүтэн өдөр шөнө уйлсан юм даг. Дараа нь уйлах нь ч, алхах нь ч сонсогдохоо больсон. Гэхдээ би хаалгаар гарч явахыг нь бас л дуулаагүй. Уйлж байхдаа хөшгөө завсар орохгүйгээр хаасан даа, хөөрхий. Тэрнээс хойш би зөвхөн эр хүний хүнд алхаа, эхүүн муухай тамхины үнэрийг л мэдрэх болсон. Харин энэ ялаануудыг тэр бүсгүй цэвэрлэж амжаагүй нь тэгэхэд намар болж байсантай холбоотой байх. Тийм ээ, тэгэхэд намар болж байсан…
Түүний энэ уйтгартай, бас учир битүүлэг яриаг сонсоод хэн, юу гэхээ мэдсэнгүй. Бас ямар нэгэн зүйл асуух гэсэн боловч хэнд ч оновчтой санаа орж ирсэнгүй. Гэсэн ч бүгд л нугасныхаа гүнд асуусан, гайхсан тэмдэгүүдийг бөхлөн хадлаа. Өнгөрсөн шөнийнхөөс арай л өвөрмөц болон өрнөсөн энэ өдрийн яриа олон цонхны зүүдэнд үл үзэгдэх бас эхүүн үнэртэй тамхи татдаг эрийг авчрах нь гарцаагүй болов. Гагцхүү бараг сар бүхэн хөшигнийхөө өнгийг өөрчилж байдаг сүүлийн үеийн цагаан хүрээтэй, өвөрмөц хар шилтэй цонх тэдний энэ шальдир бульдар түүхийг хайхрамжгүй сонсож байснаа эвшээх мэт гүрвэлзээд,
-Шал дэмий юм. Наадах чинь та нарын анхаарлыг татах л гэж ийм балай домог зохиож байгаа биз. Аягүй бол тэр аймшигт аллагад өөрөө ч гэсэн оролцсон доо гэж тоомжиргүй өгүүлэхэд бүгд зарсхийн цочив. “Аллага”. Бүгд л битүүхэндээ энэ талаар бодож байсан авч түүн шиг шуудхан хэлчихэж зүрхлэхгүй байсан учраас ийнхүү нэгэн зэрэг цочин давхийжээ. Энэ мөчид “сарны өнгийг” шүтэгч тэр бүсгүйн хаа байгааг хэлээд өгөх шиг байшингийн орой дээрээс тал хавирган сарны үзүүр цухалзлаа. Есөн давхрын харанхуй цонх тэр сарыг одоохон дараад авах нь уу гэлтэй сандран харанхуйд бүртэлзэв. Тэр:
-Хүүе, хүүе та минь ээ. Яагаад чимээгүй болчихов оо? Энэ чинь сар л гарч байна шүү дээ гэж дуу алдсанаа,
-Ямар нэг инээдэмтэй юм ярь л даа гэж адган үглэв. Гэсэн ч бүгд л өнөөх эмэгтэйн хувь заяаны тухай бодолд дарагдан дүнсийсэн тул түүний үглэхийг дуулаагүй царайлан дор дороо таг чиг болжээ. Энэ үеэр ягаан хөшигний цаанаас эмэгтэй хүний гинших чимээ дахиад л хүч нэмж эхлэхэд, хэзээ ч хөшигтэй байгаагүй цонхны цаанаас галзуурсан мэт уурсан хашгичиж, эвгүй муухайгаар чарлан аяга таваг, сав суулга тар няр хийх сонсогдлоо. Өнөөх сүрхий чанга дуутай хөгжим гэнэт чангаран газар доргитол хангинаснаа эвдрэв бололтой гэнэтхэн чимээгүй болов. Харин ягаан хөшигт цонхны цаадтайх сэрэл тачаал сая л нэг намдахад, шилэн нүүртийн үлдсэн тал шилний дээгүүр сэнжтэй төмөр аяга харван гарч ирснээ засмал зам дээр тон ёнхийн уналаа.
Шөнө дунд болж сар баруун өмнөд этгээдэд тонгойход цонхнуудын гэрэл унтарч энэ хотынхон хэнэггүй гүн нойронд автлаа. Харин гурван давхарын хэнд ч анзаарагдамгүй нэгэн цонхны гэрэл л асаалттай хэвээр хоцров. Түрүүнээс хойш юу ч дуугараагүй тэр цонхны хагас нээлттэй цагаан торон хөшигний ард үсээ толгой дээрээ шуусан залуухан эмэгтэй ширээний ард суугаад доош тонголзон ямар нэгэн зүйлийг цаасан дээр хичээнгүйлэн буулгаж суугаа харагдана. Хэнд ч анзаарагдамгүй тэр эгэл жирийн цонхны эзэн бусдынхаа яриаг тэмдэглэн авч үлдээж байгаа нь энэ. Тэгснээ шанаагаа тулан суугаад тэнгэрээс газарт буухыг тэмүүлэн гунигтайгаар мэлтийх тал сарыг тас ширтэв.
Мэдээж, тэр бол миний өрөөний цонх байсан юм.

( Сэтгэгдэл бичих? | Өгүүллэг | Оноо: 14/3 | Болор-эрдэнэ Х )

Манай сайт танд таалагдаж байвал LIKE хийгээрэй. Танд баярлалаа.

Санал сэтгэгдэл

Санал асуулга

Та нэг жилийн хугацаанд хэр олон ном худалдаж авсан бэ ?
	Ном худалдаж аваагүй
	1-3 ном худалдаж авсан
	4-7 ном худалдаж авсан
	8-11 ном худалдаж авсан
	12-с дээш ном худалдаж авсан

Санал асуулгын дүнг үзэх

Ном

Шуурайн Солонго: Гималай

Шуурайн Солонго: ТООРОЛЖИН

Ш.Сундуйжав : Үүр цайж байна

Э.Үржинханд : Хос ном мэндэллээ

Б.Болдсүх : Таг мартсан тангараг

Ч.Дагмидмаа

Санал асуулга

Та манай гишүүн болохыг хүсвэл энд дарна уу.
t
Одоо онлайнд 102 зочин 0 гишүүн байна.

Мэдээлэл оруулах

Та бүхэн өөрсдөө шүлэг, өгүүлэл оруулахыг хүсвэл энд дарж нэмж болно.

Та монгол гарын драйвэр ашиглан бичээрэй. Оруулсан мэдээллийг админ үзээд идэвхжүүлнэ.

Санал хүсэлтээ илгээх

Зургийн цомог

art_12.jpg
Хэмжээс: 600x430 131k
Сэтгэгдэл: 0
Үзсэн: 5027

зотон тос 80х100 см
Шинэ өглөө
Хэмжээс: 478x600 43k
Сэтгэгдэл: 0
Үзсэн: 4922

Зураач : Б.Хонгорзул
khongor026.jpg
Хэмжээс: 600x841 225k
Сэтгэгдэл: 0
Үзсэн: 4277

Агуулга

Monday, 2024.07.01
·	Э.Үржинханд : ҮЗЭГНИЙХЭЭ ҮЗҮҮРЭЭР
·	Э.Үржинханд : ДЭЛГЭР ЗУНААР
·	Соёрхын Пүрэвсүрэн : НААДАМ ДӨХЛӨӨ ДӨӨ... ХАНЬ ГЭЖ...
·	Э.Үржинханд : ТАНИЛ ГУДАМЖААР
·	Соёрхын Пүрэвсүрэн : НҮҮДЭЛ
·	Г.Мөнхтулга : ДУРЛАЛ
·	Г.Мөнхтулга : “293”
·	Г.Мөнхтулга : . ӨӨДГҮЙ АМЬТАН
·	Г.Мөнхтулга : ХАЙР УДАХГҮЙ ИРНЭ
Saturday, 2024.03.30
·	Лха Отхан : ӨӨР ДУУНД УЯРАХГҮЙ
·	Лха Отхан : ЦАСНЫ УТГА УЧИР
·	Лха Отхан : ХАРААЦАЙ НАС
·	Лха Отхан :ӨНГӨРСӨН БҮХЭНД УТГА УЧИР
·	Лха Отхан : ДУРСАН САНАХ БАЛЧИР НАС ...
·	Лха Отхан : ҮХЛИЙГ ҮЗЭХ Л ҮЛДСЭН...!
·	Лха Отхан : ЭЛСНИЙ ЧИМЭЭ
·	Лха Отхан : АМЖИЖ ХАЙРЛАХААР ХОРВОО ДУТДАГ
·	Лха Отхан : ГИТАРЫН УТСАН ДАХЬ САРНЫ СОНАТ ...
·	Лха Отхан : ДӨЧИН ДӨРВӨН НАМРЫН ДУУ
·	Лха Отхан : БУРХАНГҮЙ ЕРТӨНЦИЙН УУЛС
·	Лха Отхан :ШУВУУД ИРЖ БАЙНА
·	Лха Отхан : СҮҮЛЧИЙН ТУХАЙ ХҮНИЙ ЗҮҮД ...
·	Лха Отхан : ДУУСАЖ БАЙГАА БИДНИЙ АМЬДРАЛ
·	Лха Отхан : Урсгалд хөвөх навчисыг он жилүүдтэй үдэж ...
·	Лха Отхан : ӨВСНИЙ АМЬДРАЛ
·	Лха Отхан : ЭХ НУТГИЙН ТУХАЙ ДӨРВӨЛ БОДОЛ
·	Лха Отхан : Шөнийн ганцаардал минь
·	Лха Отхан : БҮҮДГЭР ТЭР ХОТ МИНЬ
·	Лха Отхан : ХУУЧИН ХАЙР ...
·	Лха Отхан : ЗАМЫН ТУХАЙ ШҮЛЭГ
Monday, 2024.03.04
·	Б.Явуухулан: Сонин сурвалжлагчид ярьсан нь
Thursday, 2024.01.25
·	Г.Мөнхтулга : ХАЙР
·	Г.Мөнхтулга : ТҮҮНД
Thursday, 2023.12.21
·	Г.Мөнхтулга : ХОТЫН ШӨНӨ
·	Г.Мөнхтулга : ЧАМД
Tuesday, 2023.12.12
·	Долгорын Цэнджав : ТАМГА
Tuesday, 2023.12.05
·	Г.Мөнхтулга : Зүүд
·	Г.Мөнхтулга : ХЭДЭН ҮГ
·	Г.Мөнхтулга : ДҮРСГҮЙ БОДОЛ
·	Г.Мөнхтулга : БҮСГҮЙ ЧИ НАМАЙГ ХҮЛЭЭДЭГ ҮҮ

Та сараа сонгоно уу

Хажууд нь хүмүүн мишээн гэрэлтэхэд Халиун дэлбээгээ дэлгэн баярладаг Инээхийг хүртэл эсэндээ мэдрэх Ижий сүнстэй Сарнай цэцэг

© Copyright 2005-2025 Biirbeh.MN. All rights reserved. By Bataka	Манай сайт танд таалагдаж байвал LIKE хийгээрэй. Танд баярлалаа.
Утас : 976-99076364 И-мэйл :info@biirbeh.mn