Хотноос өөр бараангүй
Хорвоо тэр чигээрээ
Хоолой давсан их цастай
Хонин сүрэг
Хотноосоо гардаггүй
Хэцүү өвөл байсан юм гэнэ лээ
Хэлж ирээгүй
Хийсэж ирсэн
Байгалийн тэр гамшигт
Баргийн малчин байтугай
Баатар малчныг тэвдүүлсэн
Айхтар жил байсан юм байна лээ
Хөөрхий малчдын толгой дээр
Хүнд сурталтай нийгмийн
Хөшүүн хойрго дарга нар
Хөшилдөж байсан юм гэнэ лээ
Төв хорооны тушаалаар ирсэн гэх
Төвөөс ирсэн төлөөлөгч гэж
Аймаг сумын дарга нартай цуг
Албархуу хэнхэг дарга нар
Айл хотлоор орохдоо
Архи сархад үнэртүүлэн
Ааг омголон сүр ихтэй
Амлалт үүрэг авхуулан
Ам өчгий нь аван
Айхтар сүржигнэдэг байсан юм гэнэ лээ
Мэлмийсэн цагаан талд
Мэнгэ адил хэдэн адуу харагдана
Хонь малын мөр
Холдоо нь үгүй ойрхон
Хээрийн хариулга гэж үгүй
Хичнээн арилгавч нэмэргүй
Хэвтэр бууц нь хөлдөөд дов
Хивэг тэжээлээр нь
Хичнээн бордоод нэмэргүй
Хэлж ярихад ч зүрхшээмээр
Хэцүү байсан юм гэнэ лээ
Цасанд ойсон нарны гэрэл нь хүртэл тээртэй
Цагийн мөчлөг урсах биш зогссон
Цасан дундах хот айлаас өөр бараангүй
Ертөнц тэр чигээрээ цас
Ерөөсөө ийм хэцүү байхад
Цагаа олоогүй
Цаасан малгай өмсгөх арга
Гамшиг зудын хажууд
Газар аван түгэж
Энэ жил гайгүй орвол
Ирэх жил аврага болгоно гэж
Хонгилын үзүүрийн гэрэл шиг
Хоосон мөрөөдлөөр хуурах нь
Тэр үеийн дарга нарын
Тэргүүндээ барьдаг арга байсан юм гэнэ лээ
Элдэв шалдав дүрэм журам
Их зудны хажууд бас нэг зовлон
Соёлын довтолгооныхон гэж
Сонин цаас болсон
Согтуу улаан хувьсгалчид
Ор дэр онгичин
Орсон гарсаныг нэгжин
Ширхэг бөөс олохын тулд
Шиншилж гүйх одонд төрсөн
Ширээний цаанаас шидсэн цаас
Шилбүүр уяаны улаан дарцаг
Ах дүүгийн найрамдал хэмээн
Улаан хувьсгалын үг урсгаж
Агуу удирдагчын зураг яагаад байдаггүй юм гэж
Бурханаа залдаг хойморт нь
Буян шүтээний авдран дээр нь
Буруу номтны зургийг тавиад
Тоос шороог нь сайн арчиж бай гэж
Тогтоол тушаал бичих нь халаг
Толгой түрүүгүй загнаж
Тодорхой нь аргагүй дүрэмдсэн
Гал улаан хувьсгалын
Гар хөлийн үзүүрүүд
Гамшиг зуд тэдэнд хамаагүй
Тэнэж бэтгэрэн
Тэрлэг дээл онгичих
Тэс өөр ажилтай хүмүүс
Цалин авч хоосон сүржигнэдэг
Цагийн хэцүүд хошуу нэмхээс
Хуруу нэмдэггүй
Захалж бэлчсэн хонин сүргийн
Захаар нь биш
Дундуур нь давхиал өнгөрдөг
Захиргаадалт тэр нийгмийн
Багийн төв дээр суудаг нэртэй
Байгаа үгүй нь мэдэгддэггүй
Бага шиг албан тушаалтай хэрнээ
Том дуутай их зантай түшмэд
Бараа нь хааяа үзэгдэхдээ
Ухуулга суртачилгаа гэж
Улс төр баахан ярьж байгаад
Тэр даргын илтгэл гарсан байгаа
Үүнийг унш гэж
Тэвхийсэн зузаан үнэн гаргаж өгчихөөд л
Тэр чигээрээ зугтах нь холгүй
Тэжээлийн морины хурдаар
Яарж явна гээд зугтдаг
Ядарсан малчдын толгой дээр
Ямбатан дарга нар олон байсан юм гэнэ лээ
Гамшиг туулан өвөлжиж байгаа малчдад
Ганц ч хонины ээлжгүй дарга нар
Гарч орох тоолондоо л
Нийгмийн мал муу маллаа
Нэгдлийн нэр хүнд унагалаа гэж
Нэр нүүргүй загнах бөгөөд
Нэг ч хорогдолгүй өвөлж гэж
Хонгилын үзүүрийн гэрэл шиг
Хоосон тушаалаар дарамтлан
Хотоос туслах төлчин авчирлаа гэж
Хонины ээлж өнгөрөөх байтугай
Хоногийн өл даахгүй цагаан гартанг авчирдаг ч
Хоёр ч хонолгүй өнөөх нь
Хойшоо ажилтай хэмээн
Явуулын машинд дайгдаад
Яаруу сандруу зугтдаг байсан гэнэ лээ
Зуд гэдгийг зарим дарга нар мэддэггүй байсан байх
Зурагт сонингийн мэдээнээс хардаг ч тоодоггүй байсан байх
Энэ тухай ойлголт
Эрхэм дарга нарт ховор байсан байх
Эгэл жирийн малчиныг
Яаж зүдэрч байгааг бус
Зураг нь сонины нүүрнээс салдаггүй
Хэдэн аврага баатраа л
Зуун хувь хорогдолгүй өвөлжиж байна гэж
Дугаар алгасахгүй магтдаг байсан юм гэнэ лээ
Байгалийн тэр гамшгийн хажууд
Баатрын арга туршлагаас судал гэж
Баахан сонин авчирч өгдөг ч
Гамшигт тэр нь
Гал асаахад л хэрэгтэй байсан юм гэнэ лээ
Тэр нийгмийн дарамт
Тэр жилийн зуд
Хоёр тэнцэх байх да гэж
Тэнцэх байх даа гэж
Тэр нийгэмд нухлуулж
Тэрлэгтэйгээ хатсан
Тэнхлүүн буурлууд одоо ч гэсэн хуучилдаг юм
Зуд нь зулаглаж
Зун нь сайхан болсон бөгөөд
Зуун хувь байтугай
Тавин хувь орсон малчин
Тал хувь нь байсан юм гэнэ лээ
Малчид гэж
Тэр нийгмийн хамгийн үнэгүй хүмүүс
Магадгүй тэр нийгэм
Малчдаа малаасаа дор үздэг байсан байх

Хөдөлгөөн
Хэмжээс: 600x450 109k
Сэтгэгдэл: 0
Үзсэн: 4738

mongolia2007year-126.JPG
Хэмжээс: 600x450 58k
Сэтгэгдэл: 0
Үзсэн: 4406

flo-009.JPG
Хэмжээс: 600x450 112k
Сэтгэгдэл: 0
Үзсэн: 6246