Тэр -өө чи  хүрээд ирээ юу гэж өлөн нүдээр харан суухад охин толгойгоо дохиод цай аягалж өгөхөд тэр зориуд охины гарыг давхар атган авав. Айсан охин гараа арайхийн сугалж аваад гадагш шагайн харвал ээж нь алга байж. Дүү нь уйлагнахад тэр авч бүүвэйлэхэд дүү нь тэгсхийгээд унтаад өгөв. Охиныг босоход Гэмпил үүд рүү очин хаалгаа чанга гэгч нь хоёр гурав татахад тотгоны дээр хавчуулсан гар хөрөө Гэмпилийн шилэн хүзүүн дээр унажээ. Хөрөөний ир  түүний шилэн хүзүүнд шигдэж  цус нь урсаж харагдав. “Ёо ёо муу зэвтэй төмөр” гэж хараал урсган хүзүүгээ барьж авсан Гэмпил гэрийнхээ баруун тал руу өгсөхдөө түрүүлгээ харан унасан аж. Охин маш их айсан тул ухасхийн гэрээсээ гарвал ээж нь ирж байлаа. 

Охин гүйн очиж –ээж ээ та яасан удав аа

- Өө ээж нь аавыг чинь морины аргамжаа зайлуулаарай гэхээр нь гэтэл охин - Сая аав хаалгаа чанга чанга таттал гар хөрөө унаж хүзүүг нь зүсчихлээ гэхэд  ээж нь -яана аа тийм үү гэж яаран алхаж гэртээ оров. Охин араас нь айнгуй оржээ. Ээж нь хойд эцгийнх нь биеийг татан эргүүлэхдээ-ээ бурхан минь гэж дуу алдав. Тэр үхсэн байлаа. Сэрж -миний охин битгий айгаарай, бурхан болсон байна гээд авдраа уудлан хонх гаргаж толгой дээр нь дуугаргав. Тэгээд орон дээрээс дээлийг нь  авч нүүрийг нь хаан нөмөргөлөө. Сэрж бурхныхаа өмнө очиж том голт өргөжээ. Бүсгүй бага охиноо сэрээн тэвэрч, эгчийг нь дагуулан гэрээсээ гарав. Тэр хоёр охиноо урдуур хойгуураа сундалдан нагац ахынх руугаа шогшуулжээ. 

Орой болсон хойно тэднийг буцаж ирэхэд хонь, үхэр нь хотолсон байлаа. Гэмпилийн оршуулга хоёр гурав хоногийн дараа ном ёсоороо болов. Сэржийн нагац ах хүүхдүүдээ сургуульд нь хүргэж өгөхдөө охинд нь чөлөө авсан тул Сэржийнх нүүж өвөлжөөндөө буужээ. Нутгийнх нь хүмүүс -энэ Гэмпил амиа бодсон, муу Сэржийг хардаж сэрдсэн хачин хүн байсан.Түвдэн бол эхнэрийгээ хүүхэд шиг эрхлүүлдэг  хүн байсан даа. Наадам болгонд зүс ижил морьдоор гоёод л явдаг байж билээ. Тэр эхнэр хүүхдээ тэнгэрийн орноос харж  Гэмпилийн авир байдлаас  тэднийгээ хамгаалсан ч юм бил үү. Должид гуай тэгж худлаа ярих хүн биш дээ. Тэр эхнэр хүүхнүүдэд - энэ Гэмпил Аюуш эмгэний ганц зээ охиныг нь хүчиндсэн юм гэнэ лээ. Охин нас барж эмгэн бараг солиорсон байсан. Эмгэн -би Гэмпилийг тамын орноос харна аа, охиныг минь бузарласан мангас гээд  байсан шүү гэж ярьсан байсан. Арай Сэржийн охинд нь шунасан юм биш байгаа, тэнд хавчуулсан хөрөө зүв зүгээр унана гэж байх уу, юм цаагуураа учиртай гэхчлэн ярьж байсан аж. 

Ийнхүү Сэржийнх хүү Түвшингийнхээ нэрээр дахин овоглох болов. Харин Сэрж охиноосоо сүүлд Гэмпилийн нэг л биш байсныг сонсохдоо дотроо гэмшин охиноо өрөвдөн тэвэрч уйлжээ. 

Нөхрийнх  нь их л нандигнан хадгалж тотгоныхоо  дээр хавчуулж “муу, муухай зүйлээс хамгаалдаг юм” гэж хэлдэг байсан үг нь мөн хүмүүсийн хөрөө унасан талаарх яриаг дам сонсохдоо -Үнэн, тэр минь биднийгээ хамгаалсан гэж бодох болсон билээ.

Юм бүхэн учиртай гэдэг.