Biirbeh.MN by Bataka

Т.Мөнгөнгинж : Чи миний өмнө нь сонсож байгаагүй уянгалаг аялгуу ...

Шүлэг — Wed, 10 Sep 25 15:11:34 +0800

Чи миний өмнө нь сонсож байгаагүй уянгалаг аялгуу

Чи миний өмнө нь санааширч байгаагүй шаналал

Чи миний орших хамгийн дулаахан хэсэг

Чи миний амьдрах хамгийн намуухан орчин

Чамгүйгээр амьдрах миний сүүлчийн амьдрал

Чандага саранд хүслээ даатгасан гунигт амьдрал

Чамгүйгээр амьдрах миний эцсийн амьсгал

Чанх дээшээ сүнс минь одох хэврэгхэн амь

Үрэгдсэний араас үрэгдэх болвол би чиний л араас явна

Үүрээ орхиод ниссэн шувуудын даль жигүүр нь болно

Үхсэний хойноос үхэхээр бол би чиний л хойноос үхнэ

Үүрдийн амьдрал гэж үгүй гэдэгийг мэдрүүлээд би буцна

Намар, хавар,өвөл , зун ээлжилдгээрээ ээлжилж

Намайг бас чамайг тойрсон гунигт бодлууд замхарч

Навчисны сэрчигнээ найз нөхдийн яриаг ахиж сонсохгүй аглагт

Намайг бас чамайг минь нутагшуулсан булшны дэргэд цэцэг ургана

Тэр үед хоёуулаа тэнгэрийн заадсаар хөтлөлцөөд диваажинг зорино

Тэрлэг дээлийн энгэрт нулимстай үлдсэн ижийгээ санааширч ертөнцөөс буцна

Тэр үед хоёуулаа үүлэн дунд эрхэлж

Оддын чөлөөгөөр хөөцөлдөж тоглоно

Одоо л орчлонгийн жам ёсыг дөнгөж ухаарах

Охин үр минь ертөнцөд үлдэнэ....

Т.Гинжээ 2025 08 30 0097612290624

Алтантуяагийн Анхбаяр : Тэмүүлэгч сэтгэлүүд

Шүлэг — Wed, 10 Sep 25 14:18:39 +0800

Эргүнэ гол Далай нуураа хардаг юмсан
Эргэлзсэндээ Хатан голыг тэвэрдэг болчихов
Эгийн гол Хөвсгөл далайг боддог л юмсан
Элэг нь эмтэрч Увс нуурт дасчихав...
Халх гол Буйраа түшдэг л юмсан
Хүрд эргүүлж Ганга нууртай хурьцав
Хар нуур Тэлмэн нуурандаа ойртох л юмсан
Хуянгийн бариагаа Галбын говьд даатгав...
Сүүн гол Таван богдод мөргөдөг л юмсан
Сэтгэлдээ Ачит нуурыг хүлээнэ
Сөгнөгөр Онон голыг мөрөөсдөг юмсан
Сүрэг чоноос эмээж жалгандаа л бодно...
Шар тэнгис Номхон далайг татдаг л юмсан
Шинэ зуунд Монголын их говиос гэрэвшдэг болчихов
Шаргын говь Хантайширыг ширтдэг л юмсан
Шар тэнгис эргээд л уул нурууд руу харцаа шиднэ...
Лохнесс нуур Каспийг хөтөлдөг л юмсан
Нойтогногч Хар тэнгис Доныг үзэн ядна
Ижил мөрөн Балхаш нуур руу зүтгэсэн л юмсан
Норсон хойноо Донын дэргэдээс холдохоо больчихов...
2023.08.28

ГЭРЭЛТ ДЭНГИЙН ЗҮГ

Шүлэг — Tue, 09 Sep 25 16:00:10 +0800

Гавлын ясан аяга эцгийн минь өс хонзон
Гаталж чадаагүй ах дүүгийн тэмцэл
Умард Хүннүгийн гаслан гэв...
Ай хуучин Хүннү
Ай хуучин сум...
Хаяад явсан эцэг минь хаан болгосон
Хаан ширээний төлөө хаяал минь үхсэн
Тугухунь овгийн гаслан гэв
Ай хуучин Сяньби
Ай хуучирсан сэнтий....
Нуруунаас гараад хөвүүд минь анчин болохуйяа
Нульсан Ашинагийн бичиг үсэгт шархдахуйяа
Жужаны бардамнал төгсвэй...
Ай хуучин Мугулюй
Ай хуучин анчин...
Тэнгэрийн нохсыг шүтээд гүрнийг байгуулъя
Тан улсаас мэгдээд өрнийг эзлэе
Сайд түшмэдээ цаазалж төргүй болъё
Сурхирах сумаа амрааж харьд унтуулъя
Билгэгийн хойдын зүүд гэв...
Ай хуучин Түрэг
Ай хуучин бичиг үсэг...
Ай хуучин Уйгур
Ай хуучин Кидан
Ай хуучин Татар
Ай хуучин мөхөл...
Аваргын балгасаас түмтээ дагуулсан хаан минь
Алтан улсыг нь мөхөөж гийгүүлсэн хөвүүн минь
Цагаан сүлдээ үлдээгээд нүүсэн ач минь
Цуурай өгөхөд эргээд сэрээгүй хойч минь
Ай хуучин Юань
Ай хуучин голомт...
А.А

Нямдоржийн Номинчимэг : Надгүй амьдрал ямар байх вэ?

Шүлэг — Wed, 10 Sep 25 17:21:05 +0800

Надгүй амьдрал ямар байх вэ?

Уйлж дуулахын ертөнцөд би оршихоо болиод

Ухаарал зэмлэлийн хооронд миний бодол төөрөөд

Ганцаардал гэдэг ертөнцөд түрхэн чамайг орхиод

Гантиг чулуунд нэрээ шигтгээд хэвтвэл

Надгүй амьдрал ямар байх вэ?

Салхины илбээ хурмастаас бороо нүүлгээд ирэх боловуу

Сарны доорх өвснүүд намайг санаад мэхийхүү

Нарны илч санаашраад уулны цаагуур нуугдахуу

Намайг гэсэн чи минь шүлгэнд мөнхлөн үлдээх үү

Надгүй амьдрал ямар байх вэ?

Ямх цэцгийн тоосыг зөгий үүрээд буцахдаа

Ядмагхан миний дээгүүр жаахан ч гэсэн хүртээхүү

Үүрээр жигүүрлэн ниссэн борхон болжморын шулганаа

Үүрд хэвтэх над дээр хааяа ганганаж шулганах уу?

Надгүй амьдрал ямар байх вэ? …..

Нямдоржийн Номинчимэг

Р. Отгонцэцэг : Таван жилийн өмнөх би тэндээ үлдсэн ...

Шүлэг — Fri, 08 Aug 25 12:32:17 +0800

Таван жилийн өмнөх би тэндээ үлдсэн

Тансаглал хайр тайван сайхан инээдтэйгээ

Таны мэддэг тэр алдаа оноотойгоо

Таг харанхуй ч байж мэдэх мэдлэгтэй

Татах төдий үрчлээ танил төдий нэртэйгээ

Таван жилийн өмнө үлдсэн

Хорин жилийн өмнөх би бас тэндээ үлдсэн

Хонгорхон инээд хорь гаранхан настайгаа

Хожим харамсахгүй юм шиг гэнэн дурлалтайгаа

Холын их мөрөөдөл хүсэл тэмүүлэлтэйгээ

Хосгүй нандин залуу насны эрч хүчтэйгээ

Хорин жилийн өмнөх яг тэндээ үлдэж хоцорсон

Тэртээ он цагийн би тэнд л тэр чигээрээ үлдсэн
Тэгэхэд байсан зүс царай дүр төрх минь тэндээ л хадгалагдсан

Намайг яг энэ цагийн өнгөнөөс хуучин шиг нь битгий хайгаарай

Нас намба хоёроо чив чимээгүйхэн өлгийдөн авсныг минь бүү гайхаарай

Халзан морьт. Р. Отгонцэцэг

Сосорбарамын Төмөрхуяг : Борхон охин (Орчуулга)

Шүлэг — Mon, 04 Aug 25 14:33:27 +0800

Зуны өнлөөний гэгээн үүрээр

Зуурхан би хөршийн цэцэрлэгрүү харц шидэв

Борхон царайтай Молдав бүсгүй нүдэнд тусав

Баяр дүүрэн усан үзэм түүсээр байна даа

Бие сэтгэл дүүрэн нүүр нүд минь гэрэлтэж байна.

Үгээ хэлж сэтгээ нээмээр санагднаа.

Үүр цайх зуны өглөөг угтахаар байна даа

Үелзэн урсах голын эрэг дээр зогсоод

Бужгархан ногоон агч модыг хараад

Би чамдаа дуралсалсандаа басхүү ичингүйрч байна

Тиймээ буржгархан агч модод минээ

Тэгээд борхон хацартай Молдав бүсгүй байнаа

Молдав нутагын партизан цэргүүд

Мөнхийн отряд болон жагсчээ

Манай тэр хөвгүүд гэрээсээ гарахдаа

Маш холыг угтах замыг тосон хүлээж байна.

Өтгөн шугуйд партизан цэргүүд жагсаж байна.

Өргөн толгодыг даван үелзэх ойн навчис

Буржгар ногоон агч мододыг харах тусмаа

Булиглах зүрхнээсээ хагацалын гунигийг дуулах болноо

Бужгархан агч модны навчис сайхан байнаа

Борхон хацартай Молдав бүсгүй ойн жимээр одно

Болзож ч чадаагүй гунихарлыг сэтгэлдээ тээж үлдэнэ

Бодол сэтгэлдээ намайгаа багтаах зай алгуу

Борхон царайтай Молдав бүсгүйг бодон сууна уу.

Бужгар ногоохон агч мододын дундуур

Борхон царайтай Молдав бүсгүйтэй учирлаа би.

Буржгар ногоохон агч модон төгөл дундуур алхана би.

Сайн уу, залуу минь гэж эелдэг мэндлээд,

Сайхан ногоон агч модон төгөл дундуур алханаа

Бужгар ногоохон агч мододон төгөл дундуур

Булиглах зүрхний хайрын дуутай алханаа бид

https://www.facebook.com/ganin.ngo

Сосорбарамын Төмөрхуяг : 40 настай хүүхэн

Шүлэг — Mon, 04 Aug 25 14:28:28 +0800

Дөлгөөн болоод сайхан төрх нь

Дөчин насанд нэг л намба тэгшхэн

Дөнгөж нэг харц тогтоох эгшинд

Дөрвөн зүгийн бодол тогтохоо болив уу?

Сэтгэлээр унах нь нэг л хачин санагдах юм аа

Сэм сэмхэн бодолд дарагдуулах юм аа

Сэрж мартах нь юунд их зовооно вэ?

Сэвж сэрээвэл залуу насандаа буцаад ирэх юм аа.

Нэг л алдаа хожимын итгэлийг алдуулж мэдэх

Нэгэн баяр хожимын гунигийг сэргээж мэдэх

Нээрээ үнэн хайраа шуудхан огт хэлэхгүй

Нэнжин сэтгэлээ үгээр огт хэлэхгүй дээ

https://www.facebook.com/ganin.ngo

Сосорбарамын Төмөрхуяг : 20 настай бүсгүй

Шүлэг — Mon, 04 Aug 25 14:26:52 +0800

Гоо үзэсгэлэн төгс уран бие нүд баясгана

Гоёмсог дэгжин хөөрхөн царай харц булаана

Туяхан нуруу уяхан хөдөлгөөн сэтгэл татна

Тунгалаг нүдэн уянгалаг дуун зүрх хөглөнө

Гэгэлгэн сэтгэл араас нь урсаж очмоор

Гэнэт учраад харц урсан тунараад баймаар

Гэгээн орчлонгийн нандин бодолыг дагуулмаар

Гэнэн ухаан далдыг саналгүй санаа алдмаар

Бүсгүй чиний төлөө л бүлээн зүрх цохилоод л

Бүтэхгүй ч гэсэн залуу насаа хармгүй үрээд л

Сайхан инээмсгэлэлийн төлөө юугаа ч ер

харамламгүй

Санасан бодсон бүхэн ар араас долгисож айсуй

Санаандгүй учрал бодлын гүнээс оргилож айсуй

Сайхан бодолууд ухаанаас ундарч сэтгэл баясгахуй

Яанам билээ үгсийг хайн сэтгэл минь орчлонг тэмтчинэ

Яадаг ч байсан ухаандаа зураглаж чамайгаа бүтээнэ

Янагийн үгс ичингүйрлийг мартан уруул даван чамд хүрнэ

Ялгуун санаа мэргэдтэй цэцэрхэж сэтгэлд оршино

Яруу найрагчийн сэтгэлд зүрх булиглуулж оршино.

https://www.facebook.com/ganin.ngo

Сосорбарамын Төмөрхуяг : Өсвөр нас

Шүлэг — Mon, 04 Aug 25 14:25:48 +0800

Балчир насанд ээжийн хайр сэтгэлд хүрэх

Бага насанд аавын үг ухаанд буух

Өсвөр насанд өөдөө дэвших тэмүүлэл их

Өнгөт орчлонд хийж үзэх хүслэн их

Том боллоо гэж өөрийгөө бодох санаа их

Тоомжиргүй ярих үг бүхэнд ухаан эс хүрэх

Бодолгүй хэлсэн үгэнд ихээр гомдох

Боодолтой бэлэгийг задалж үзэх гоё санагдах

Өсвөр насанд найзын царай хөөрхөн харагдах

Өсгөлөн биеээ томоо болсон гэж тэрээр санах

Томчуудыг дуурайх үйл бүхэн мундаг санагдах

Толгой дээгүүр алхах амжилт урам хайрлах

https://www.facebook.com/ganin.ngo

Жогноогийн Бямбасайхан : ҮХЭХ ХҮСЭЛ (өгүүллэг)

Бямбасайхан Ж — Fri, 01 Aug 25 09:20:59 +0800

Би өндийх гээд чадсангүй. Хэдэн зуун удаа оролдоод ч нэмэр болсонгүй. Гар, хөл, толгой минь үл захирагдан яг л биеийн маань гадуур шавраар хэв цутгаад баглачихсан мэт хөдөлж үл чадна. Ийнхүү хөдөлгөөнгүй хэдэн цаг ганихран хэвтэхдээ хүйтэн, харанхуй, аниргүй ертөнцөд орь ганцаар буйгаа мэдэрч, зовиур, гаслан намайг бүчин эзэрхийлж, айдас хэрхэн биеийг маань хэмлэн мэрж байгаа нь дуулдан үхэл надаар тохуурхаж байлаа. Намайг амьдаар минь авсанд хийж, хаа нэгтээ оршуулжээ. Уйлсан боловч нулимс гарсангүй, цээжин дотор зүрх агшиж, тэнийн зовиуртайгаар хэнгэнэнэ. Үхлийн муухайгаар тарчилж үхэх болсондоо, энэ зовлонг санаандгүйгээр надад үүрүүлсэн гэр бүлдээ гомдовч, хачирхалтай нь сэтгэл маань ер бусын амгалан байх төдийгүй, нэгэнт оноогдсон, хаашаа ч мултарч үл чадах энэ хувь тавилантайгаа эвлэрч, болох гэж буй зүйлийг тэвчээртэйгээр хүлээж авахыг тулгах ажээ. Хэдий бие минь үхэж байв ч тархи, ухаан мэдрэл маань хэвийн ажиллаад байлаа. Энэ нь нэг талаар надад үхлийн амтыг агшин агшнаар мэдэрч, үхэх зовлонг эцэстээ хүртэл туулах тарчлааныг авчрах ч нөгөөтэйгүүр хорвоогоос одох хүртэл өнгөрсөн амьдралаа дурсан сэтгэлийн жаргал эдлэх сүүлчийн боломж болохыг би ухаарав. Орчлон хорвоод тоос хөдөлгөсөн тавин жилийн минь амьдралд хамгийн жаргалтай мөч юусан билээ гэж бодоход тархи маань өнгөрснийг ухаж төнхөж, үй олон үзэгдэл, үйл явдлыг шүүрдэж гарав. Тэгмэгц нүдэнд минь хорин жилийн тэртээх тэр нэгэн хаврын өдөр зурсхийн тодорлоо.

Жогноогийн Бямбасайхан : ХОТЫН НЭГ ӨГЛӨӨ (өгүүллэг)

Бямбасайхан Ж — Thu, 31 Jul 25 17:43:23 +0800

Цагийн өмнө тэр дэн буудлын умгар өрөөнд хөлсөнд нэвчсэн нойтон хөнжилд шургачихаад бүсгүйн мөрөө давсан буржгар үсээр хуруугаа ороон тоглонхон зугаатай хэвтэж байлаа. Харин дэргэд нь шөнийн клубэд танилцсан бүсгүй зүүрмэглэж байна уу гэлтэй нүдээ хагас аньчихсан, нүцгэн энгэртээ зөрүүлсэн булбарай гараараа хөхнийхөө толгойг имрэн байв.

Бүсгүй нүдээ нээж, толгойгоо хажуу тийш үл ялиг гилжийлгэн хөшигний завсраар цухуйх өглөөний бүүдгэр гэгээ рүү гөлөрч, уруулаа хазалснаа гэнэтхэн өндийж орны хөлд хэвтэх дотоожоо шүүрүүтээ “Явлаа” гэж бувтнав. Тэрээр орон дээр хэвтэж байгаад хоёр хөлөө гозойлгон дотоожоо углаад, босож сандлын хөндлөвч дээр тохоостой хөхний даруулгаа авахдаа нэг гараараа хөхөө халхалснаа буруу харж зогсон хэдхэн хөдөлгөөнөөр сурмаг гэгч даруулгаа зүүлээ.

Б.Бядаа: Хайрт хүүдээ...

Шүлэг — Thu, 31 Jul 25 17:42:08 +0800

Эрээн бараантай хорвоогийн замд бүдчиж явахдаа

Эрдэнэс олсон би азтай хүн

Энгэрт минь зүүгдэх нэг насны гоёлоо

Энэ орчлонгоос хүртсэн би жаргалтай хүн

Хэвлийдээ тээсэн арван сарын минь хугацааг

Хир удаан амьдрахаар биш хэн болсноороо нөхөж төлөөрэй миний хүү

Хэлж жишээлж зүйрлэмгүй төрөлтийн их өвдөлтийг

Хэнгэргийг минь цоортол дуулгах сайн мэдээгээр шагнаарай миний хүү

Даргын ширээнд сууж баяжаарай гэхгүй ээ ээж нь

Дорд үзэгдэж гудайхгүй л яваарай миний хүү

Мөнхийн ус , ач тус нэхэхгүй ээ ээж нь

Мөрөөдөлтэй, зорилготой л амьдраарай миний хүү

Сөхөрмөөр өдөр байхад бахархмаар өдрүүд түүнээс ч олон байдаг юм

Сүү амлаж өссөн болохоор шантрахгүй зүтгээрэй үр минь

Сөгдөж гуйсан мөртлөө ширвээд хаядаг хүн ч байдаг юм

Сайн муу бүхнийг ялгаж амьдраарай хүү минь

Эр өсч эсгий сунадаг жамтай хойно

Ээжийн хүү томоо эр болно

Эхнэр авч аав ч болно

Ээ дээ хүү минь хариуцлагатай л байдаг юм шүү

Аавынх нь гэрээс инээмсэглэл тодруулж авчихаад

Ад үзэж гомдоож л болдоггүй юм шүү

Арван сар ижий нь чамайг тээж өсгөсөн шиг

Алдрайхан үрийг чинь төрүүлэх гэргий түүнийгээ дээдлээрэй

Хүүтэй хүн алздаггүй юм гэсээн

Хөл нь дөрөөнд гар нь ганзганд хүрэхийн цагт

Хүүгээрээ бахархаж баярын нулимс унагах өдрүүдэд

Хүрэхэд тун ч ойрхон байна даа ижий нь

Эх хүн гэдэг чинь өвдөх бас үхэх эрхгүй байдаг юм

Ээжээ гэж дуудах үрсийнхээ төлөө л залбирдаг юм

Сайн явахад нь ил магтаж

Саар амьдрахад нь дотроо зэмлэж

Сайхан гэж муухай үед нь ч хэлдэг

Сайн дурын баатар юм шүү дээ

Тиймээс үр минь зөв л амьдраарай

Тээглэсэн чулууг түлхэх хүчтэй байгаарай

Тэвчишгүй хэцүүд ч нулимс бүү унагаарай

Тэгж байж л зорьсондоо хүрдэг хорвоо юм шүү дээ хүү минь

Б.Бядаа

Жогноогийн Бямбасайхан : ҮХЛИЙН ХЭМЖҮҮР

Бямбасайхан Ж — Thu, 31 Jul 25 17:36:51 +0800

Гэнэт өрөөний хаалга хяхтнахад зүүрмэглэн хэвтсэн Төмөр “Өдийд гэрийн үйлчлэгч явчихсан баймаар юм” гэж бодоод аниатай зовхио залхуутайхан өргөвөл үүдэнд түүний хуучны танил сүүтийн зогсож байлаа. Төмөр хэдэнтээ уулзаж байсан хэр нь л өнөөг хүртэл юүдэнтэй хар цув нөмөрсөн хуучин танилынхаа царайг огт тогтоож чадаагүй билээ. Түүнтэй уулзсаны дараа хуучин танилын нь царай төрх бүүр түүрхэн хар манан болон санаанд нь үлддэг байв. Аанай л энэ удаа түүний царайг алдалгүй сайн харж авъя гэж санаад өндийн суулаа. Төмөр танилынхаа царай өөд шимтэн харц гүйлгэсэн ч харанхуйд уусан бүрэлзээд тоймтой харагдсангүй, эгээ л манан дунд зогсоо юм шиг сүүмэлзэнэ.

Жогноогийн Бямбасайхан : НЭГЭН БҮСГҮЙН ЖАРГАЛТАЙ ӨДӨР

Бямбасайхан Ж — Thu, 31 Jul 25 17:34:33 +0800

Зохиолч Жогноогийн Бямбасайхан

Өнөөдөр Нэгдүгээр сарын сүүлийн өдөр, Жаргал бүсгүйн цалин буужээ. Хотын олонх албан газрууд цалингаа энэ өдөр тавих тул үдээс хойш дэлгүүр хоршоогоор хэсэх хүмүүсийн хөл хөдөлгөөн илэрхий ихсээд ирнэ. Цалингаа авсан хүн андашгүй, царайд нь баяр баясал гэрэлтээд, дуу хоолой нь хөхиүн, цолгиун болчихно. Энэ өдөр хүмүүсийн ааш зан налгар, талбиун байдаг билээ. Маргааш ч бас ийм сайхан өдөр үргэлжилж тэтгэвэрээ авсан настангууд ач, зээгээ дагуулаад үнэ хямдаар нь зах, худалдааны төвөөр бэдрэн сарын хүнсээ цуглуулах гэж хэрэндээ мачийна. Хүнсний үнэ тэнгэрт хадсаныг тэд энэ өдөр мэдэж, худалдагчийг нэмлээ гэж загнан уураа гаргаад эцэст нь аманд ч үгүй, хамарт ч үгүй тэтгэврээ чамлахдаа сонгосон гишүүнээ юу ч хийхгүй байна гэж зүхэхэд дагаж яваа балчрууд нь нүдээ бүлтийлгэн дуугүй чагнана. Тэгээд л маргаашаас их хотын бухимдуу, бүүдгэр амьдрал хоёр долоо хоногийн турш хөвөрсөөр “аванс” цалин буухад хот дахиад гэрэлтэнэ. Дараа нь дахин хоёр долоо хоног хараал, хэрүүлтэй өдрүүд үргэлжилж, гундуу амьдралдаа бухимдсан олонх нь өчүүхэн жаахан явдалд ч ач холбогдол өгөн шүүн хэлэлцэж, эцэс сүүлдээ бүтэлгүйтэл, гачигдал зовлонгийнхоо учир шалтгааныг хэн нэгэнд нааж уур уцаараа гаргаснаар тайтгарлыг олно. Ингэж байтал цалин бууж жаргалтай өдөр ирнэ. Сард ердөө гурван өдөр хүмүүс баяр хөөрөөр цалгиж бусад цагт хөмсгөө зангидан биенээ хажиглаж, уурсах ажээ. Монголын амьдрал ийн үргэлжилж, хөврөн байлаа.

Жогноогийн Бямбасайхан : ХОРИН МЯНГАТЫН ДЭВСГЭРТ (өгүүллэг)

Бямбасайхан Ж — Thu, 31 Jul 25 17:29:55 +0800

Явган хүний цардмал зам дээр хэвтэх хорин мянгатын дэвсгэртийг зургаан нүд зэрэг харуутаа гурван гар ухасхийж нэг эр түрүүлээд шүүрэв. Мөнгийг гартаа атгасан эр баярлан инээхэд ялимгүй хоцорсон авгай:

-Алив наад мөнгө өгөөдөх. Би хаячихаад эрж явна гээд түмбэгэр хөхөөрөө түрэн давшиллаа. Уусан архи нь гараад шартаж үхэх гэж явсан эр:

-Миний мөнгө. Би гээчихээд харин оллоо хэмээн мөчөөгөө өгсөнгүй. Тэгмэгц тэр хоёроос арай сүүлдсэн бүсгүй:

Жогноогийн Бямбасайхан : ҮЙЛИЙН ҮР (өгүүллэг)

Бямбасайхан Ж — Thu, 31 Jul 25 16:26:13 +0800

Зохиолч Жогноогийн Бямбасайхан

Сум нутагтаа салхи шиг хөдөлгөөнтэй эр гэгдэж явсан Хариг Бадам өөрийг нь дуудуулсныг сонсоод Гүдэс Цүлтэм ихэд гайхжээ. Хагас жилийн өмнө Хариг Бадамыг зэргэлдээ сумын хоёр эртэй панз үсэргэн ууж суугаад гэнэт харваж үхлүүт байна гэх зайгуул үг дуулдан төд удалгүй өнөөх чинь сэхээд өрөөл татуу болчихож хэмээх яриа хойноос нь хөвөрч билээ. “Гоё сайхан бүхнийг эдэлж явсан ганган эр байж билээ. Гэм нь гар хатуутай хүн дээ” гэж мориныхоо явдал дунд Гүдэс Цүлтэм элдвийг бодсоор нар тонгойх алдад Бөөргөний аманд зусч буй тэдний гэрийн гадаа иржээ. Цүлтэм хорин жилийн тэртээ амьтан хүний хараа булаасан хонгор үрээгээ алдсанаас хойш Хариг Бадамтай үг солих байтугай хаа яваа газарт нь тааралдчихгүйг хичээн мөр бултуулах болсон билээ. Тэрээр морио зэлнээс уячихаад уяатай банхарын хөв хөв хуцахыг ч анзааралгүй гэр өөд газар ширтэн сөөг сөөг алхсаар явж оров. Хоймор Хариг Бадам зүүн хөлөө урагш жийчихсэн хажуулдас хийн суух ажээ. Түүний хагас атгаатай зүүн гарын хуруунууд хатаж хорчийгоод хэрээний сарвуу шиг махигар болсныг Цүлтэм зэрвэс харлаа.

Ж.Бямбасайхан ГУРВАН ЗҮҮД (богино өгүүллэг)

Бямбасайхан Ж — Thu, 31 Jul 25 16:16:32 +0800

Адуу үүрсэж, хонь ямаа майлалдах дуунаар өвгөн зүүднээсээ сэрлээ. Өдрийг унтаж барах болсон өвгөн зүүдэлж байхдаа зовиуртайгаар чийхрах магнайн хөлс нь чамархай даган урссаар чих рүү нь орон нойтогнохыг, амьсгалдаа түүртэн оволзох цээжин дотор нь мигуй шургачихаад зогсолтгүй хүржигнэхийг, насны эрхээр аль хэдийн юмсыг мэдрэхээ байсан хурууны нь өндөг үрчгэр даавууны сэмэрхийд орооцолдоод час час чимчигнэхийг мэдэрч хэвтжээ. Дотор нь харанхуйлж, амьсгаа нь тагларчих гээд нүдэнд нь бөөн цагаан очис бутрахад тэрээр уухилсаар өндийлөө. Арваад жилийн өмнөөс өвгөний нүд цайсаар өдгөө хорвоо ертөнцийг сүүмийх дүрс төдийхнөөр харах болсны дээр нартын жамд ханиа алдаад гурван ч оныг үджээ. Тэр үеэс удмын ч гэх үү, хар залуугийн л уцаар ааштай өвгөн улам зөнөгрөж, хажиг зожиг нь хэтийдсэн тул охин нь аргагүйдэхдээ ирж яваа цагийн аясыг тааруулж хаяандаа дөрвөн ханат барьснаар өөрийн зоргоор өдөр хоногийг нөгцөөх болов.

Э.Үржинханд : ХОЙШЛУУЛСААР…

Үржинханд Э — Thu, 31 Jul 25 16:01:43 +0800

"За, яах вэ" гэсээр

Цаг хугацаа урслаа

"Зав гарахаар" гэсээр

Зуны цэцэгс зулгарлаа

"Тэгж байгаад" гэсээр

Тэнгэрийн өнгө сэрүүслээ

"Тэгсгээд болоё" гэсээр

Тэмдэглэлийн хуудас цайрлаа

Хойшлуулсаар хоцорлоо

Хором алдалгүй эхэлье

"Маргааш маргааш" гэсээр

Мөрөөдлийн зам бүдгэрлээ

"Нэг л эхэлнэ" гэсээр

Намар ч айлсаад ирлээ

"Асуудлын ард нь" гэсээр

Амьдралын өнгө гандлаа

"Дараа дараа" гэсээр

Давшгүй тоосонд дарагдлаа

Алгассаар... замхарлаа

Алив — одоо л эхэлье

Э.ҮРЖИНХАНД

2025.07.30

Э.Үржинханд : Шинэхэн таримал модод сэхийнэ ...

Үржинханд Э — Mon, 30 Jun 25 13:46:54 +0800

***

Шинэхэн таримал модод сэхийнэ

Сэргэг шинэ совингоор тэмүүлнэ

Ширхэг ширхэг борооны дусал

Шивнээ шиг сэрүүн бодолд шивэрнэ

Ганцхан зуны ургамал шиг харагдавч

Газар тэтгэсэн түүх нь цаглашгүй

Зулайд нь бүжиглэх дусал бүхэн

Зуны тэнгэрээс зүрхлэн шаагилдана

Өндрөө гайхуулна гэдэг өсөлт бус

Өөрийгөө өргөмжлөх нь хөгжил бус

Тэр залуухан модод хүртэл сануулна,

Тэвчээрийн эцэст таашгүй бэлэг угтдагийг.

Э.ҮРЖИНХАНД

2025.06.26

Э.Үржинханд : СЭТГЭЛИЙН ЧИМЭЭ

Үржинханд Э — Mon, 30 Jun 25 13:44:59 +0800

Сонс доо…

Чимээгүйд дуу байдаг

Сэтгэлийн дотоод аглаг дахь

Сэрүүн шивнээ үл мэдэгдэнэ

Өөрийнхөө дуунаас давчихаад

Өөрийгөө сонсохоо больчихсон

Бодол болгондоо эзлэгдчихсэн

Борхон зүрхээ булаалгачихсан

Зовлон гэдэг дайсан биш

Жаргал гэдэг шагнал биш

Эгшиг ч үгүй, үг ч үгүй

Гүнээс цуурайлах тэр л чимээ

Байнга хамт байсаар л байхад

Бас л мэдрэхээ байчихсан

Үнэн дуу хоолойгоо

Өөрийнхөө ертөнцийг,

Чагна даа ...

Сэтгэлийн чимээгээ

Э.ҮРЖИНХАНД

2025.06.27

” МОНГОЛ МОРЬ” яруу найргийн наадам

Мэдээ, мэдээлэл — Tue, 24 Jun 25 11:24:02 +0800

” МОНГОЛ МОРЬ” яруу найргийн наадмын удирдамж

НЭГ. УРАЛДААНЫ ЗОРИЛГО

1.1 Монголчууд бид мянга мянган жилийн туршид харьтан дайсны үймээн түйвээн, улс орны тусгаар тогтнол эрх чөлөө, жаргал зовлонгийн хахир хатуу бүхнийг морьтойгоо хамт туулж ирсэн арвин түүхтэй ард түмэн билээ. Хол ойрыг холбогч ухаант монгол морь нь улс гүрэн болоод хотол олон, хайртай эзэндээ хэрхэн тус нэмэр болж байсан ховор түүх, монгол морины хүч чадал, сүр жавхлан, үйл алдрыг монгол туургатан даяар мөнхжүүлэн сэргээх зорилготой.

1.2 Монгол хэл соёлоо гэсэн хүн бүхэн найртай сайхан ёсоор яруу тансаг хэл соёлоо хамтдаа бадраан, дэгжин дэлгэрүүлж нийт ард түмнээ эгнэшгүй гайхамшигт чихэнд чимэгтэй яруу эгшиглэнт Монгол морины сэдэвтэй шүлэг найргаар тэтгэн тэжээж, соён гэгээрүүлэхэд уралдааны зорилго оршино.

ХОЁР. УРАЛДААНЫ ХЭЛБЭР

2.1. Цахимаар нээлттэй

ГУРАВ. УРАЛДААНЫ ЖУРАМ НӨХЦӨЛ

3.1. Уралдаанд 18-с дээш насны шүлэг яруу найраг сонирхон бичдэг хүмүүс болоод нийт яруу найрагчдын дунд зохион байгуулна.

3.2. Уралдаанд оролцохыг хүсэгчид 2025 -оны 06 дугаар сарын 25-ээс эхлэн yruusliinchuulgan@gmail.com цахим хуудсанд хандаж, зааварчилгааны дагуу бүртгүүлнэ.

3.3. Оролцогч нь энэхүү бүртгүүлсэн хаягт аль улс , аймаг хотоос оролцож байгаа болон овог нэр утасны дугаараа тодорхой бичиж явуулна.

3.4.Уралдааныг мэргэжлийн шүүгчид шүүн явуулна.

3.5. Тус уралдаанд оролцогч нь морины сэдэвтэй хоёр шинэ шүлэг уншина.

3.6. Видео бичлэгээр унших шүлэг нь урьд өмнө нь хэвлэгдэж, цахим орчинд нийтлэгдэж байгаагүй байх.

3.7. Уралдаанд оролцогч нь мандатын 20.000 төгрөг 5055412630 дансанд тушаана.

3.8.Оролцогчид нь энэхүү уралдаанд хоёр шинэ шүлгээ шивсэн байдлаар ирүүлнэ.

3.9. Хүндэтгэх шалтгаантай бол шүлгээ өөр хүнээр уншуулж болно.

Анхаарах зүйлс:

• Бүртгэл нь баталгаажсан оролцогчид шүлэг уншсан өөрийн дүрс бичлэгээ yruusliinchuulgan@gmail.com цахим хуудас руу зааварчилгааны дагуу ирүүлнэ. Холбогдох утас: 99399416, 85888237

• Бүтээлээ дүрс бичлэгийн төхөөрөмжөөр хөдөлгөөнгүй нэг байршлаас дуу дүрсний өндөр чанартай бичнэ.

• Хэрэв гар утсаар дүрс бичлэг хийх бол утсаа хөндлөн барьж нэг байршлаас хөдөлгөөнгүй бичсэн байх.

• Шүлгээ уншихдаа оюуны өмчийн зөрчилтэй дуу, дүрс ашиглахыг хориглоно.

ДӨРӨВ. УРАЛДААНЫ ШАЛГАРУУЛАЛТ

4.1 Уралдаанд оролцогчдоос сүүлийн шатанд шалгарсан 15 яруу найрагчийн нэрсийг 8 сарын 15-д зарлана.

ТАВ.

ЗОХИОН БАЙГУУЛАГДАХ ГАЗАР:

5.1. Сүхбаатар аймгийн Уулбаян суманд 2025 оны 08сарын 22-д болно.

ЗУРГАА. УРАЛДААНЫ ШАГНАЛ УРАМШУУЛАЛ:

1. Тэргүүн байр эзэлсэн яруу найрагчийг хурдан удмын даагаар шагнах ба эхний 9 яруу найрагчийг шагнаж урамшуулна.

Ерөнхий ивээн тэтгэгч, Сүхбаатар аймаг Уулбаян сумын Уяачдын холбоо

Хамтран зохион байгуулагч “ЯРУУСЛЫН ЧУУЛГАН” ТББ

Н.Ачиймаа : Хайр бус үзэл бодолд удирдуулагсад хөөрхий

Шүлэг — Wed, 18 Jun 25 11:41:51 +0800

Ойлгохийг бус үгүйсгэхийг эрхэмлэгчид хөөрхий

Ойртохыг бус холдохийг хүсэмжлэгчид хөөрхий

Энд бус хаа нэгтээ байгсад хөөрхий

Итгэл бус үнэмшлээрээ явагсад хөөрхий

Эрмэлзлэл бус албадлагаар амьдрагсад хөөрхий

Эгэл бус чаминд ороогдогсод хөөрхий

Энэ хорвоогийн сайхан бүхнээс зугтагсад хөөрхий…

Зохиогч: Нямдоржийн Ачиймаа. Дуучин Баясгалангийн "Хос хун" дууны үгийг зохиосон.

Н.Ачиймаа : БАЙДАГ

Шүлэг — Wed, 18 Jun 25 11:41:09 +0800

Түймэр мэт шатах сэтгэл гэж байдаг

Тэрэг шиг өнхөрөх итгэл бас байдаг

Түлэгдэж гандах хүсэл гэж байдаг

Тамирдан унах тэвчээр бас байдаг.

Эргэлдэн хөврөх бодлууд гэж байдаг

Эцэшгүй зовоох гунигууд бас байдаг

Ээнэгшүүлж орхих найдвар гэж байдаг

Эргүүтүүлж хаях худал бас байдаг.

Бадран оргилох эрэл гэж байдаг

Буйргүй тэмтчих айдас бас байдаг

Бахдан дурсах мөч гэж байдаг

Баяргүй гуниглах цаг бас байдаг.

Оволзон галзуурах ой ухаан гэж байдаг

Овилоггүй загнах нас бас байдаг

Оройг ухах мэдлэг гэж байдаг

Оодрон шогших тэнэг бас байдаг.

Хайрлаж чадалгүй дурлах гэж байдаг

Хайлуулан урсгах харц бас байдаг

Харуусч хайлалгүй алдах гэж байдаг

Хуулан хаях үнэн гэж байдаг.

Зохиогч: Нямдоржийн Ачиймаа. Дуучин Баясгалангийн "Хос хун" дууны үгийг зохиосон.

Н.Ачиймаа : ХҮҮХЭЛДЭЙ БИТГИЙ БОЛ

Шүлэг — Wed, 18 Jun 25 11:39:18 +0800

Чи алхаж явна. Гэтэл чи энэ мөн үү?

Ганган дэгжин хувцас чинь чамайг илтгэх үү?

Гадагш хандсан инээмсэглэл чинь чиний зүрхнийх үү?

Гэдийж яваа байдал чинь үнэн төрх чинь мөн үү?

Хүнтэй яриад инээмсэглэхдээ

Чи өөр юм бодон сууна

Болж байгаа мэт дүр эсгэн

Шаналж байгайгүй мэт царайлна...

Хэнийг бид нар хуурах гэж

Энэ орчлонд ирээ вэ?

Хаашаа ч харсан дүрүүд

Хүн нь хаана байна вэ?

Бодол санаа зүрх чинь

Хоорондоо зөрөөд байна

Болж байгаа мэт амьдрал чинь

Үнэндээ там байна

Хүнд л сайхан харагдаж гэж

Энэ орчлонд төрөө юу?

Хүний бодлоор амьдрах гэж

Энэ хорвоод ирээ юу?

Дотор гадар хоёр чинь

Газар тэнгэр мэт ээ

Дулаан сайхан байдал чинь

Худал хуурмаг дүр ээ..

Инээж байхдаа чи

Дотроо шаналж байдаг

Хүн л мэдэхгүй бол

Өөрийгөө хуурч байдаг.

Өөрийгөө олооч ээ

Хүний сайхан хорвоод

Өрөөлийн бодолд захирагдан

Хүүхэлдэй битгий болооч.

Үнэнээрээ байя, хүмүүс ээ

Өөрөө өөрсдөөсөө урвахгүй байя!

Үйлийн үртэй энэ орчлонд

Өөрөө өөрсдийгөө зовоохгүй байя.

Зохиогч: Нямдоржийн Ачиймаа. Дуучин Баясгалангийн "Хос хун" дууны үгийг зохиосон.

Н.Ачиймаа : БИТГИЙ ГОЛ

Шүлэг — Wed, 18 Jun 25 11:17:41 +0800

Битгий гол өөрийгөө, хэзээ ч битгий гол!

Хамаг юмны утга алдагдсан ч битгий гол

Хүн болгонд муу хэлэгдээд байсан ч битгий гол

Хүүр болъё гэж бодогдоод байсан ч битгий гол

Битгий гол өөрийгөө, хэзээ ч битгий гол!

Хамаг нандин итгэлээ алдсан ч битгий гол

Хар муу санаатныг таниагүй ч битгий гол

Халаасандаа мөнгөгүй тэнүүчилж явсан ч битгий гол

Битгий гол өөрийгөө, хэзээ ч битгий гол!

Хамаг сайхнаасаа хагацаж хоцорсон ч битгий гол

Хүний өмнө царай алдаж явсан ч битгий гол

Хашхирч орилж уйлж, дуулсан ч битгий гол

Битгий гол өөрийгөө, хэзээ ч битгий гол!

Өрөөл бусдыг ч гэсэн нэгэн адил битгий гол

Өрөөлийн бус өөрийн хайрыг өөртөө бэлэглэ

Өөлөх бус, өөдлөх сэтгэлээр амьдралд ханд

Битгий гол өөрийгөө , хэзээ ч битгий гол!

Байгаа бүхний сайхныг харах гэж оролдоод үз

Бас дээрээс нь нэмж бүтээх гэж хичээн чармай

Битгий гол өөрийгөө, хэзээ ч битгий гол!

ЧИ ЧАДНА, БУРХАН ИВЭЭНЭ, БИТГИЙ ГОЛ!

Зохиогч: Нямдоржийн Ачиймаа. Дуучин Баясгалангийн "Хос хун" дууны үгийг зохиосон.

Сосорбарамын Төмөрхуяг : Тавь шүргэсэн бүсгүй

Шүлэг — Mon, 16 Jun 25 14:34:13 +0800

Тавь шүргэсэн бүсгүй

Тавилатайгаа эвлэрэхгүй

Духны үрчлээ үсний буурал хамаагүй

Дур татах инээмсэглэл байхад болно

Ач зээ нар тойроод ирсэн ч хамаагүй

Аз жаргал дундарахгүй шүү

Санасан сэтгэлээ сархадаар дүүргэж мэднэ

Санаандгүй учралд барьц алдана гэж үгүй

Сайхнаа мэддэг учир бардам байх нь аргагүй

Сатаарч мартах нь үгүй нарийн тооцоо

Санааширч гуниглах нь үгүй

Санаснаа бүтээх ухаан бий

Тавь шүргэсэн бүсгүйд

Танхил хайрын увдис бий

Таамаг тавьж элдэвийг эрэгцүүлэх хэрэггүй

Таалагдсан бол санаагаа шууд хэл

Насны ханиа гомдоож нэг зүрхлэхгүй

Намба алдаж амгаланг огт эвдэхгүй

Сүнс байлаа ч сүүдэрт ер нуугдахгүй

Сүжиг төрөн залбирлаа ч

Сүүмгэр энэ орчлонг

Гэрлээр чимэа увьдас бий.

Тавь хүрсэн бүсгүйд

Танилын нүүрний буян бий

Тайван амьдралыг бүтээх

Таван хүслийн ид шид бий.

Fifty year lady

Never get in harmony

No matter wrinkles are on your face

Just smiling to me is enough well

No matter when grannies are coming around me

But happinnes never get lower

Griping no loss during sudden cross of dating

I am aware of my beauty so proud of mine

But never considerable my own thinking

Never get worry

Have a mind to complete my ideas.

Fifty year lady get

Treasures of sacred love

Do not think hard about anything

Hence she is liked say it directly

Dо not dare to hurt your love ever

Never disturbing your calm

Never hiden in shadow

Hence you are soul

However praying to soul

I have an ability to decorate the world with light

Fifty year lady

Get a virture of familuarity

Get a magic to complete five wishes

disturbing your calm

Never hiden in shadow

Hence you are soul

However praying to soul

I have an ability to decorate the world with light

Fifty year lady

Get a virture of familuarity

Get a magic to complete five wishes

https://www.facebook.com/ganin.ngo

Х.Эрдэв : БҮСГҮЙ МОРЬ ХОЁР АДИЛХАН

Шүлэг — Fri, 13 Jun 25 13:49:17 +0800

“Эвий эрдэнэт сайхан морьд минь”

БҮСГҮЙ МОРЬ ХОЁР АДИЛХАН”

Бүсгүй морь хоёр

Бүсгүй морь хоёр адилхан

Бийрэн цэнхэр бүжиг шиг адилхан

Гоо үзэсгэлэн гоолиг бүхнээрээ адилхан

Голын уснаа гараад ирэх нь бүр адилхан

Дээлтэй монгол эрийн мөрөөдөлд багтдаг нь адилхан

Дэл нь хийсээд намилзах нь дэндүү дэндүү адилхан

Бүсгүй морь хоёр адилхан

Зүүдний дагина шиг зүүрмэглэж зогсох нь ижилхэн

Зүс зүсээрээ гоёод наадам чимдэг нь ижилхэн

Уртын дууны шуранхайд уянгалуулж магтуулдаг нь ижилхэн

Уран гоо биеэ шинжүүлж зогсох нь ижилхэн

Шилийн сайн эрийн зүрхийг эзэмддэг нь ижилхэн

Шөнжин бодол ээдүүлж нойргүй хонуулдаг нь ижилхэн

Бүсгүй морь хоёр ижилхэн

Бүжин уулсын оройг саравчлан байдаг нь адилхан

Бүрэнхий шөнийн алсад чимээ чагнадаг нь адилхан

Хайртай эзнээ хээр хаядаггүй зан нь адилхан

Хатуу бүхэнг туулж чаддаг тэвчээр нь адилхан

Бүсгүй морь хоёр адилхан

Ханагар сайхан эрчүүдийн харцыг булаадаг нь адилхан

Холын хүний цулбуурт хөтлүүлж оддог нь адилхан

Урт урт санаа алддаг нь хааяахан

Унагсан нулимсаа дэлэндээ нуудаг нь адилхан

Эзэн хүндээ үнэнч байдаг ухаан нь адилхан

Эргээд нутгаа санадаг нүд нь адилхан

Бүсгүй морь хоёр адилхан

МЗЭ- ийн шагналт Х. Эрдэв

Н. Марал-Үжин : Харуусал, гуниг

Шүлэг — Thu, 24 Apr 25 10:11:56 +0800

Нэгнээ би мартаж, гүн гунигт сэтгэлээ

Өнгөрсөн сайхан дурсамжтайгаа тавьж явуулъя, би.

Нуусан гунигаа нулимс болгон урсгаж,

Сайхан бүхнээ бодон уйлж сууна, би.

Дараа төрөлдөө чамтайгаа

Аз жаргалтайгаар учирч,

Алдаж, онох зүйлгүйгээр

Чамдаа дахин дурлаж...

Алаг хорвоод аядуу нэмэн,

Аз жаргалыг эрэн хайж,

Насан эцсийг хүртэл

Ханилан жаргая даа, хайрт минь.

Эгэл жирийнээр ижилсэж,

Хослон амьдарч,

Идэр залуу насаа

Чамдаа зориулъя, би.

Хэрэв дараа төрөл гэж байдаг бол

Тэнд л бид хоёул жарган мандая, хайрт минь.

Сүүлчийн итгэл,

Сүүлчийн үгээ чамдаа хэлээд,

Тавьж явуулъя даа чамайгаа...

Н. Марал-Үжин

Э.Үржинханд : ЭНХИЙН ЦЭРЭГ БҮСГҮЙ

Үржинханд Э — Tue, 18 Mar 25 14:57:51 +0800

Орчин цагийн Зэвсэгт Хүчин үүсч хөгжсөний 104 жилийн ойн баяр " Монгол цэргийн бахархлын өдөр"-ийн мэнд дэвшүүлье

Монгол Улс Мандан Бадраг

Үг Э.Үржинханд Ая П.Эрдэнэбулган

Дуучин МУСТА П.Золзаяа

ЭНХИЙН ЦЭРЭГ БҮСГҮЙ

Талын хонгор салхинаас

Тансаг монгол анхилна

Танил намуун аялгуу

Таатай яруу эгшиглэнэ

Энхийн цэрэг бүсгүйн

Хайрын дуу энэ байна

Эвийн цэцэгт нутгаас

Дэлбээлсэн эрдэнэ энэ байна

Мөрдөст ганган мөрнөөс

Мөнгөн одод гялалзана

Мөнхийн ариун тангарагтай

Мэндийн дуулал эгшиглэнэ

Дахилт

Цэлмэг уудам тэнгэртээ

Цэнгэлт шувууд жиргэнэ

Цэнгэг урсгалт гол шиг

Цэвэр сэтгэл эгшиглэнэ

Дахилт

Э.Үржинханд : "Хайрын эх орон", "Сэтгэлийн жимээр" хос ном уншигчдын гарт хүрлээ

Үржинханд Э — Mon, 27 Jan 25 08:12:25 +0800

МЗЭ-ийн гишүүн, Гомбын Сэр-Одын шагналт яруу найрагч, зохиолч Энхбаатарын Үржинхандын "Сэтгэлийн жимээр", "Хайрын эх орон" хос ном уншигчдын гар дээр очлоо. "Сэтгэлийн жимээр" номын шүлгүүдээр дамжин дотоод сэтгэлийнхээ жимээр аялах, бодит үнэнийг олж харах, дотоод ертөнц рүүгээ өнгийх, хувь хүн өөрийгөө таних ухамсрын сэрүүлэг нь болохын зэрэгцээ эерэг хандлага түгээхийг зорьжээ.

Харин энэхүү номтой ихэрлэн гарсан түүний найм дахь ном болох "Хайрын эх орон" яруу найргийн түүврээс халуун дулаан хайр, сэтгэлийн амар амгалан, эх орон хайр гэдгийг мэдрэх, бахархах, амьдралд дурлах, сэтгэлийн гэрэл гэгээ, эрч хүч, урам зоригийг мэдрэх юм.

Энэхүү хоёр ном агуулгын хувьд хоорондоо өөр өнгө аястай бөгөөд улс даяараа хос бичигтэн болж байгааг угтан уншигчиддаа шүлгээ уншингаа хөнгөн маягаар монгол бичгээ сайжруулахад нь тус болох зорилгоор шүлэг тус бүрийн ард монгол бичгийн хөрвүүлгийг хавсаргасан нь номын гол онцлог аж.

Зохиолч, яруу найрагч Э.Үржинханд нь 2010 онд яруу найргийн "Өөртөө үнэнч үлдэнэ", 2011 онд "Шувуутай цүнх" өгүүллэгийн түүвэр, 2012 онд "Хайр цацруулж..." яруу найргийн түүвэр, 2014 онд "Зөндөө хайртай" яруу найргийн цомгоо олон нийтэд хүргэжээ. 2015 онд туужийн "Хэзээ ч оройтохгүй", яруу найргийн "Алсын гэрлийн хэлтэрхий" номоо хосоор нь гарган олны хүртээл болгож байв.

Богино өгүүллэгийн "Утгын чимэг" наадамд "Атаархал" өгүүллэгээрээ амжилттай оролцсон ба гадаад, дотоодын олон ном, сонин, сэтгүүлд бүтээлүүд нь хэвлэгдсээр байна. Ном болгон өөрийн гэсэн дахин давтагдашгүй өвөрмөц онцлог, илэрхийлэмжтэй. Өөр өөрсдийнхөөрөө таалан болгоогч уншигч танаа хүндэтгэн мэхийе.
Та бүхэн Интерном, Мир номын дэлгүүрийн салбаруудаас номоо худалдан аваарай.