Уруул давж нисээгүй хайрын цэнхэр тогорууд
Улаахан зүрхний нууранд уйлж ганганаад удлаа
Дурсамжын дэвтэрт чинь зурсан өнчин цагаан хун
Сүүлчийн хонхны дуунаар холын холд одсон байна
Хэрвээ би хосоор нь зурсан бол
Хамтдаа л байх байсан даа, чи бид хоёр...

Ижийгээс минь ирсэн захидал шиг
Энэ олон навчисыг ээ
Амьдрал хэмээх модны мөчирөөс
Ганцхан миний л төлөө
Амь гуйж дүүжлэгдсэн
Сүүлчийн ганц навч юм, ижий минь

Намайг явсны маргааш бороо татарч гэнэлээ
Би үүл байж
Намайг явсны маргааш цэцэгс хагдарч гэнэлээ
Би эрвээхэй байж
Намайг явсны маргааш маргааш мод нүцгэрч гэнэлээ
Би навчис байж
Намайг явсны маргааш нуур цантаж гэнэлээ
Би шувуу байж
Намайг явсны маргааш саахалтын хүү уйлж гэнэлээ
Би инээд  нь байж
Намайг явсны маргааш айлын бэр баярлаж гэнэлээ
Би гуниг байж
Намайг явсны маргааш хөлчүү залуус давхиагүй гэнэлээ
Би сархад байж
Намайг явсны маргааш л намар болчихож гэнэлээ
Би зун байж...

Эр моддын хүсэл
Мөчирөө сарвайж ургадаг
Тэр мододын төгөлд би
Хааяа хааяахан төөрдөг
“Хайртай, хайргүй, хайртай гэж
Навчисаан тасдаж өлмийд минь дэвсдэг
Хамгийн сүүлчийнх нь навч
Хайртай гээд л унадаг
Харин ганцхан модны мөчирт л
Алчуур минь уяатай дэрвэдэг...

Дарвуулт цагаан саран
Далайн усанд зангуугаа хаяхад
Харвасан ододын хэлтэрхий сувд болоод
Хав харанхуйн дундаас гэрэлтэж ургана...
Тэр алсын залуу сувдан сондор илгээж
Зүрхэнд минь дэгээ шиднэ
Тэгэвч миний сэтгэлийн их усан
Загас үгүй уулын гол буюу..

Ёроолгүй тэнгис мэт сэтгэлийн минь дээгүүр
Хөлөг онгоц шиг хөвж одсон
Ертөнцийн сайхан зураг   чамайг
Ерөөгөөд би үлдэж чадна аа
Далай гүндээ ямар амгалан байдгийг
Давстай усанд сувд нандин ургадгийг
Даана ч чи минь мэдэж амжихгүй нь дээ

Мөчир дээр ургасан мянган навч
Нисэж зүүдлэн
Нэг нэгээр алдуурсаар
Мөн чанартаа энэ
Навчисын бус
Хүмүүний тавилан буй заа

Цэнхэр нулимсандаа сормуусаа дүрээд
Шаналал зурсан хацар арваннаймтай хүүгийнх
Цэцгийн амь тасдаад хайрын гуйлт ургуулсан
Гэнэн нүдний харц арваннаймтай түүнийх
Эхлээд чи надаас янжуурын гал гуйсан
Эгч нь татдаггүй ээ
Дараа нь чи надаас хайрын гал гуйсан
Даана ч  болохгүй нь ээ, чи шатчихна...

Бандийн Болормаа.

Чиний гэр дээр суугаад
Нэгэн шувуухай жиргэнэ
Чанга атгавал үхчихнэ
Алгаа дэлгэвэл нисчихнэ...
Халуухан зүрхний чинь мөчирөөс үүрээ эрэх
Хайр гэдэг тэр шувуухай би юм
Хаашаа ч нисэхгүй ээ, чинийх ээ чинийх
Харин нисчихвэл эргэж буухгүй ээ
Тэнгэрийнх ээ тэнгэрийнх...

Бандийн Болормаа.

B2-021.JPG
Хэмжээс: 600x400 114k
Сэтгэгдэл: 0
Үзсэн: 4761

kho-003.JPG
Хэмжээс: 600x450 111k
Сэтгэгдэл: 0
Үзсэн: 4250

IMG_1103.jpg
Хэмжээс: 600x800 202k
Сэтгэгдэл: 0
Үзсэн: 4934