BIIRBEH.MN by Bataka

Шүлэг: Х.Сүглэгмаа : ГУРВАН САЙХАНЫ ЭНГЭРТ НАР МАНДАХЫГ ҮЗЭЭРЭЙ
Оруулсан admin on 2009-12-28 21:12:54 (5663 уншсан)

Гурван сайхны энгэрт нар мандахыг үзээрэй
Гуниггүй залуу нас эрх хонгор сэтгэл минь ингэж эхэлсэн юм
Гургалдайн дуутай орчлонд зэрэглээ гижигдэн инээхэд
Гурван говийн цэцэг үсийг минь сүлжиж ургасан юм
Гуниггүй залуу нас шиг нар мандахыг үзээрэй

Гурван сайханы энгэрт яргуй нүдлэхийг хараарай
Хацраа хонхойлгоод инээсэн доголон нулимстай хүүгийн
Халтар бариувчны энгэрт зүүгдэж ирсэн жаргал
Хайраар өлгийдөж тэвэрсэн ижий аав хоёрых нь
Хадагтай ерөөлтэй алган дээр дэрвэж ургах нь энэ ээ
Хайраар өлгийдөж тэвэрсэн яргуй нүдлэхийг хараарай

( Дэлгэрэнгүй... | Сэтгэгдэл [] | Шүлэг | Оноо: 0/0 | Сүглэгмаа Х )

Шүлэг: Х.Сүглэгмаа : ЗЭРЭГЛЭЭНД БИЧСЭН ШҮЛЭГ
Оруулсан admin on 2009-12-28 21:11:55 (5971 уншсан)

ЗЭРЭГЛЭЭНД БИЧСЭН ШҮЛЭГ
Хайрт ах Энх-Амгалангийнхаа гэгээн дурсгалдзориулав

Зэгстэй цэнхэр нуур нь
Нутагтаа л байна
Зэллэж нисдэг шувууд нь
Нуурандаа л байна
Зэндмэнь тамгатай хээр нь
Адуундаа л байна
Зэрэглээ тэмтэчсэн талдаа л
Ах минь та алга

Хадтай харгиатай жим нь
Ууландаа л байна
Хархан нүдтэй хүү чинь
Харуулдаад л байна
Хамт өтлөх нөхөд чинь
Олуулаа л байна
Хайртай бүхнийхээ дэргэд л
Ах минь та алга

( Дэлгэрэнгүй... | Сэтгэгдэл [] | Шүлэг | Оноо: 0/0 | Сүглэгмаа Х )

Шүлэг: Х.Сүглэгмаа : НАРАНБУЛАГИЙН ТЭНГЭРТ ҮҮРЭЭР НИССЭН ШУВУУ
Оруулсан admin on 2009-12-28 20:49:38 (6008 уншсан)

Энд зогсоод салхин зүг гараа алдалж байсан
Эргэн тойрон уул ус, өвс ногоо нь янзаараа
Энд зогсоод сар жилүүдийг шүлгэн эрихээр хэлхсэн
Эрх шувууд нь шулганан жиргээд өнөө хэвээрээ
Энд зогсоод та аав л ижийгээ үдсэн
Эр суль өвс намрын наранд шаргалтахыг үзсэн
Энд зогсоод та Алтан-Овоо, Ганга нуурыг шүтэн биширсэн
Эцэг уул, Ижий нуур чинь эв янзаараа
Энд зогсоод та тэнгэр газраар гэрчлүүлэн
Эх монгол хэлнийхээ эрдэнийн есөн үсгээр
Эрхэм найрагчийн нэр Дашбалбар гэж бичсэн

( Дэлгэрэнгүй... | Сэтгэгдэл [] | Шүлэг | Оноо: 0/0 | Сүглэгмаа Х )

Шүлэг: Х.Сүглэгмаа : АЛАГ БАЯНГИЙН ТАЛД ХУУЧИЛСАН ШҮЛЭГ
Оруулсан admin on 2009-12-28 20:46:21 (5706 уншсан)

Агаа ээж бид гурав
Сухай дээр сууж
Алагбаянгийн талыг
Хотолзуулан хуучлав

Балдан гуайх нь энүүхэн хойно Шартдаа
Байхгүй нөгөө муу хөгшин нь мөнхөрсөн
Аюушийнх Ганцсухайд хэдэн гэрээрээ
Ач нар нь сургуульд ороод суман дээр

Бор-Овоод Ёндон гуайх
Ботготой ингэ нь наанаа л харагдана
Улаан Чука шуухинаа хүрлээ л гэсэн
Уулзвал биеийг нь асуугаарай миний хүү

( Дэлгэрэнгүй... | Сэтгэгдэл [] | Шүлэг | Оноо: 0/0 | Сүглэгмаа Х )

Шүлэг: Х.Сүглэгмаа : ГҮНЖ ЦАГААН САРАН ДОР хэмээх таталбар аяз
Оруулсан admin on 2009-12-28 20:45:13 (5521 уншсан)

Ус мөрөн урсана
Гүйлс цэцэглэх цагаар
Уяран уяран дуулна
Гүнж цагаан саран дор

Үүл үүлэн нүүнэ
Гүйлс цэцэглэх цагаар
Үймрэн үймрэн жиндэнэ
Гүнж цагаан саран дор

Цан хяруу унана
Гүйлс цэцэглэх цагаар
Цаг хугацаа гуниглана
Гүнж цагаан саран дор

( Дэлгэрэнгүй... | Сэтгэгдэл [] | Шүлэг | Оноо: 0/0 | Сүглэгмаа Х )

Шүлэг: Х.Сүглэгмаа : ЧАМД ХЭН ХЭЛСЭН ЮМ БЭ?
Оруулсан admin on 2009-12-28 20:43:34 (6641 уншсан)

Миний амрагийг хав хар нүдтэй гэж
Миний амрагийг хачин дөлгөөн аальтай гэж
Миний амрагийг хавар эртийн бороо шиг гэж
Миний амрагийг намар оройн нар шиг гэж
Чамд хэн хэлсэн юм бэ

Миний амрагийг халгин цалгин дуулдаг гэж
Миний амрагийг хад эмтэртэл гуньдаг гэж
Миний амрагийг халуун зуны харз шиг гэж
Миний амрагийг хайруу өвлийн зэрэглээ шиг гэж
Чамд хэн хэлсэн юм бэ

( Дэлгэрэнгүй... | Сэтгэгдэл [] | Шүлэг | Оноо: 5/1 | Сүглэгмаа Х )

Шүлэг: Х.Сүглэгмаа : Нүүдэл
Оруулсан admin on 2009-06-17 23:59:12 (7675 уншсан)

Орчлон тэр чигээрээ нүүнэ
Одод сарны тухай анивалзан анивалзан дуулна
Очиж хэзээ ч үзээгүй наран зүг рүү шувууд ниснэ
Ойр байгаа бүхэн холдохын төлөө тэмцэнэ
Орчлон тэр чигээрээ нүүнэ

Уулс байрандаа мянган жил оршихгүй
Ус голдрилоороо мянган жил урсахгүй
Үргэлж тэндээ бадрагч одод гэж байхгүй
Үлгэр жаргахын хооронд л бууриа сэлгэж оддог
Үхэл гэж байхгүй
Дүрсээ солихын л төдий юм
Үнэндээ нүгэл ч гэж байхгүй
Ариусахын л төдий юм

( Дэлгэрэнгүй... | Сэтгэгдэл [] | Шүлэг | Оноо: 0/0 | Сүглэгмаа Х )

Шүлэг: Х.Сүглэгмаа : Надад захидал бичээрэй
Оруулсан admin on 2009-03-01 01:06:33 (4886 уншсан)

Намрын шаргалхан өвс хагдарч байхад
Насаараа чамайг хайрлана гээд захидал бичээрэй
Нарны цацраг бүхнийг шингээн байж
Нандин ийм дулаахнаар гээд тэвэрч үнсээрэй
Надад захидал бичээрэй

Өвлийн цагаан цасан бударч байхад
Өөрөө даарч байна уу гээд захидал бичээрэй
Өнгөө бүгдийг нь хувиргачихсан орчлонг
Өө ийм байдаг юм гэж аргадаарай
Надад захидал бичээрэй

Хаврын энхэрхэн яргуй дэлбээлж байхад
Хайр минь нялхаараа гээд захидал бичээрэй
Хадган цэнхэр униарыг нь сөхөн байж
Хамгийн анхны бороог хүлээж байна гээрэй
Надад захидал бичээрэй

Зуны алаг цэцэгсийг сугсарч байхад
Зураг шиг байгаа биз гээд захидал бичээрэй
Ертөнц тэр чигээрээ дэлгэрч байна
Ербусын хайр л ийм байдаг гээрэй
Надад захидал бичээрэй

( Сэтгэгдэл [] | Шүлэг | Оноо: 0/0 | Сүглэгмаа Х )

Шүлэг: Догшин хутагтын нутаг
Оруулсан admin on 2009-03-01 01:04:45 (6190 уншсан)

Дулаан харын энгэрт яргуй нүдлэх цагаар
Дулдуйт Ажаагийн нутгаар бууж нэгэн мордлоо
Дорнын буурал талаар нүүгээд өнгөрсөн үүл шиг
Догшин хутагтын нутаг нулимсан зэрэглээтэй тослоо

Домог үнэний завсарт ногтруун сүүдэргүй нутаг сан
Долоон үеэ үзсэн ч Ноён гэгээн минь эзгүй
Дотогш гадагшаа алдарсан номын их сэнтий сэн
Дорно өрнийг шуугиулсан Ноён гэгээн минь эзгүй

Арван аравны нүүдэлд ачаа тэнцүүлээд эзгүй
Асралт Охин тэнгэртээ аврал одуулаад эзгүй
Сарны цагаан дарсыг залгилж суугаад эзгүй
Саранхөхөөний намтраа хуалж дуулаад эзгүй

( Дэлгэрэнгүй... | Сэтгэгдэл [] | Шүлэг | Оноо: 5/1 | Сүглэгмаа Х )

Шүлэг: Х.Сүглэгмаа : Дарс
Оруулсан admin on 2009-03-01 00:43:28 (6959 уншсан)

Урд минь хундага дүүрэн
Ув улаан дарс байна
Уулзахаараа чиний дайлах дуртай
Угийн танил үнэр амт байна

Ийм улаахан өнгийг Пушкин чамаас олзолж
Ихэмсэг Музагаа дуулахдаа уруулыг нь чимсэн байна
Ийм гашуун амтыг Бёрнс чамаас амталж
Их л залуухан байхдаа амьдрал дарс шиг гэж дуун алдсан байна

( Дэлгэрэнгүй... | Сэтгэгдэл [] | Шүлэг | Оноо: 0/0 | Сүглэгмаа Х )

Шүлэг: Х.Сүглэгмаа : Талын хөх салхи
Оруулсан admin on 2009-02-06 23:48:31 (7531 уншсан)

Өвгөдийн асаасан галын дэргэд
Өргөж мандаасан зулын дэргэд
Өөрт минь зэхсэн өлгийн дэргэд
Өчнөөн жил хүлээсэн их талын дээр

Ижийтэй минь
Араг түшилцэж
Эцэгтэй минь
Алга дэлгэлцэж

Ирж явна гэж
Тэнгэр мөрлөсөн
Энд унаг гэж
Газар зөөллөсөн

Энэ хөх салхи
Талын хөх салхи

( Дэлгэрэнгүй... | Сэтгэгдэл [] | Шүлэг | Оноо: 0/0 | Сүглэгмаа Х )

Шүлэг: Х.Сүглэгмаа : Ижийдээ эрхэлсэн шүлэг
Оруулсан admin on 2008-04-11 04:28:23 (6219 уншсан)

Орчлон ертөнцийг улам яруухан дуулнам би
Орсон борооны ус цэцгийн шилбэн дээр тунаж үлдэхийн цагт
Орчлон ертөнцийг улам ялдамханаар хайрланам би
Орой намрын бороонд цэцгийн шилбэ жиндэхийн цагт
Орчлон ертөнцөд улам ихээр хоргодном би
Одоо биш ч маргааш үүл хөллөн бороо зүсэрнэ гэхээс
Орчлон ертөнцөд улам ихээр шунан дурланам би
Орох борооны түрүүчээр шүлгээ бичнэ гэхээс
Ижийдээ очоогүй хаврын салхины үзүүр жавартай
Энд удаан суувал цас ханзарахыг мартах нь ээ
Эрх хонгор сэтгэл ижийдээ зүүгдэхгүй удахлаар
Ивэлж байгаа ертөнцөөс сүү залгилж сэрээд байна

( Дэлгэрэнгүй... | Сэтгэгдэл [] | Шүлэг | Оноо: 0/0 | Сүглэгмаа Х )

Шүлэг: Х.Сүглэгмаа ： Алишер Новайтай амраглаж хонолоо
Оруулсан admin on 2007-04-30 22:16:42 (7751 уншсан)

                Агаарт цас хялмаалах мөнгөлөгхөн шөнөөр
                Арван хоёр сарын сэрүүн тэнгэрийг нөмөрч
                Алишер Новайтай амраглаж хонолоо
                Аялагхан сэтгэлд нь халууцаж хонолоо

                Дарсны сайхан нь аль билээ, алив ууя гэнэ
                Далавчны цуцашгүй нь аль билээ, алив нисье гэнэ
                Давшгүй бэрх нь аль билээ, алив туулъя гэнэ
                Даанчиг уянгалаг нь аль билээ, алив дуулъя гэнэ

( Дэлгэрэнгүй... | Сэтгэгдэл [] | Шүлэг | Оноо: 0/0 | Сүглэгмаа Х )

Шүлэг: Х.Сүглэгмаа ： Нүд
Оруулсан admin on 2007-04-30 22:13:48 (7950 уншсан)

                Хаалга цонх
                Хана туурга
                Хаяавч салхивч
                Хаа сайгүй нүд
                Хачин гунигтай
                Хайрламаар
                Хажууд нь очиж учирламаар
                Хаа сайгүй нүд
                Алга хавсарч залбирна, тэр л нүд
                Аргаа барж замд одно, тэр л нүд

( Дэлгэрэнгүй... | Сэтгэгдэл [] | Шүлэг | Оноо: 1/1 | Сүглэгмаа Х )

Шүлэг: Х.Сүглэгмаа : Бурханаас нуусан амраг
Оруулсан admin on 2007-04-30 22:11:51 (8724 уншсан)

                Зүсэр зүсэр бороог хүйтэн гээд яах вэ
                Зүүдэнд эрхэлдэг амрагаа хүнийх гээд яах вэ
                Зөмбөр зөмбөр уулсаа холынх гээд яах вэ
                Зөн совингийн амрагаа хүнийх гээд яах вэ
                Ай миний
                Зүн совингийн амраг аа хө

( Дэлгэрэнгүй... | Сэтгэгдэл [] | Шүлэг | Оноо: 5/1 | Сүглэгмаа Х )

Шүлэг: Х.Сүглэгмаа ： Сагстай цэцэг барьсан бүсгүй
Оруулсан admin on 2007-04-30 22:10:05 (5639 уншсан)

            Сагстай цэцэг барьсан бүсгүй дуулна
            Сайхан аялгуу байна даа гэж бодно
            Сарны жижигхэн нулимс ертөнцийн бөөрөнд унаж сэрүү татна
            Сагстай цэцэг барьсан бүсгүй дуулна
                Сагстай цэцэг барьсан бүсгүй уйлна
                Сонин юм даа гэж гуниг төрнө
                Солиорсон юм шиг чөтгөрийн чуулган бүжиглэж халуу шатна
                Сагстай цэцэг барьсан бүсгүй уйлна
            Сагстай цэцэг барьсан бүсгүй явж одно
            Салхи хаанаас байна вэ гэж би асууна
            Саваагүй амьтан минь, ертөнц мөхчихлөө гэж тэр инээмсэглэнэ
            Сагстай цэцэг барьсан бүсгүй явж одно

( Сэтгэгдэл [] | Шүлэг | Оноо: 0/0 | Сүглэгмаа Х )

Санал асуулга

Та нэг жилийн хугацаанд хэр олон ном худалдаж авсан бэ ?
	Ном худалдаж аваагүй
	1-3 ном худалдаж авсан
	4-7 ном худалдаж авсан
	8-11 ном худалдаж авсан
	12-с дээш ном худалдаж авсан

Санал асуулгын дүнг үзэх

Ном

Шуурайн Солонго: Гималай

Шуурайн Солонго: ТООРОЛЖИН

Ш.Сундуйжав : Үүр цайж байна

Э.Үржинханд : Хос ном мэндэллээ

Б.Болдсүх : Таг мартсан тангараг

Ч.Дагмидмаа

Санал асуулга

Та манай гишүүн болохыг хүсвэл энд дарна уу.
t
Одоо онлайнд 115 зочин 0 гишүүн байна.

Мэдээлэл оруулах

Та бүхэн өөрсдөө шүлэг, өгүүлэл оруулахыг хүсвэл энд дарж нэмж болно.

Та монгол гарын драйвэр ашиглан бичээрэй. Оруулсан мэдээллийг админ үзээд идэвхжүүлнэ.

Санал хүсэлтээ илгээх

Зургийн цомог

Хүрэлтогоот
khureltogoot-08.jpg
Хэмжээс: 600x450 105k
Сэтгэгдэл: 0
Үзсэн: 5302

Г.Ариунболд Зотон, тос 60x90
Хөгшидийн буйр
Хэмжээс: 600x458 112k
Сэтгэгдэл: 0
Үзсэн: 5452

Ёл хад
YolHad_46.JPG
Хэмжээс: 700x525 86k
Сэтгэгдэл: 0
Үзсэн: 4037

Агуулга

Та сараа сонгоно уу

Хажууд нь хүмүүн мишээн гэрэлтэхэд Халиун дэлбээгээ дэлгэн баярладаг Инээхийг хүртэл эсэндээ мэдрэх Ижий сүнстэй Сарнай цэцэг

© Copyright 2005-2025 Biirbeh.MN. All rights reserved. By Bataka	Манай сайт танд таалагдаж байвал LIKE хийгээрэй. Танд баярлалаа.
Утас : 976-99076364 И-мэйл :info@biirbeh.mn