Төгсгөл нь үзэгдэхгүй урт зам. Түүний цаана чи зогсоно.

Чиний яг эсрэг талд би зогсоно. Яг зуун жилийн өмнө бид энд ирж зогссонсон. Тэгэхэд ногоон гэрэл асчихсан байсан. Одоо ч бас ногоон гэрэл асчихаж.  Торойх ганц машин, ганц хүн ч энэ зам дээр, энэ замын ойр хавьд ч алга.

Чиний харцанд инээмсэглэл ч алга. Бас нүдэнд чинь гуниг ч алга. Замын дохиолуур ногоон өнгөөр гэрэлтэж, чамайг над руу ирэхэд юу ч саад болохгүй. Гэхдээ мэдээж чи над руу ирэх ёсгүй. Учир нь чи наашаа ганц л алхвал улаан гэрэл асч, хаанаас ч юм үй олон машин гарч ирээд, чиний амьдралыг төгсгөнө.

Миний харц асар их догдлол, бас түүнээс ч илүү эмзэглэл, айдастай. Тэр бүхэн бүгд нэгдээд миний бяцхаан зүрх рүү довтолно. Ногоон гэрэл асаалттай. Уг нь бидэнд л үйлчлэхээр зохиогдсон тэрхүү амьдралын тухай хуулиар бол би л чам руу очих учиртай. Тэгвэл бид хоёр тэврэлдэн учралдаад, тэгээд хэзээ ч хагацахгүйгээр мөнхийн хайрандаа умбан жаргана.  Гэвч би чам руу очьё гэж бодсон ч хөл минь хөшчихөж. Би алхаж чадахгүй байна. Хэтэрхий их бардамнал, асар их хайр минь хоёр хөлийг минь тушчихаж.

***

Надад хайртайгийнх нь төлөө

Тэр залууг ч бас

Сарнаас дүүжилбэл таарна

***

Тэр

Өчигдөр татсан тамхиныхаа акрукыг цуглуулж

Өөдөсхөн сонинд нямбайлан ороогоод

Асааж

Тааламжтай тамшаалж сууна

Хаа нэгтээ орхисон, гээсэн, голсон, учирсан амрагуудаа

Цуглуулж

Ийнхүү тамшаалвал ч...

2009-1-11

***

Битгий гэж хэлэхийн завдалгүй

Сэтгэл дээр минь чи

Шаржигнатал гишгэчихлээ

Тэгээд над руу эргэж хараад

Ямар их чимээтэй навч бэ гэж

Хэнэггүйхэн өгүүлэв                                                         

2008.09.06

***

Салаа гэзэгтэй нас минь

Чиний харцнаас бишүүрхэж

Саахалтын уулыг даваад одоход

Чамд хайргүйгээ ухаарсан…                                                

2005-10-27

***

Чамайг хэзээ ирж амтлахыг мэдэхгүй ч

Ахиад л би дарс нэрж сууна,

Нулимсаараа

Чамайг хэзээ ирж аргадахыг мэдэхгүй ч

Ахиад л би уйлж сууна

Зүрхээрээ…

Ц.БАТТУЯА 2008.08.15 http://salkhi-met.blog.banjig.net

Намайг сахиж

Цонхон дээр минь хонодог

Тэргэл саран

Өнчин лааны минь гэрэлд дарагдаад

Гав ганцаар гуниглаж үүр цайлгав

2011-02-13

***

Ахиад уулзахгүй байх вий гэсэн

Айдасыг минь хөөж

Хацрынхаа энэ өхөөрдөм хонхорхойгоор

Дэнчин тавин

Хэзээ ч хагацахгүй ээ гэж

Тангараглаж чадах уу?

2011-02 сар

***

Ганцхан чиний өлмийд л сөгдөж ургасан

Цэцэг байхыг хүснэм

Нулимсаар чинь бус инээдээр чинь услуулж дэлгэрдэг

Нүцгэн дэлбээгээрээ харцыг чинь татсан

Цэцэг болохыг хүснэм

Ц.Баттуяа 2011-03-17 http://salkhi-met.blog.banjig.net

***

Хэн ч мэдэхгүй энэ нууцыг

Хүн төрөлхтөн бүгдээрээ марттал нь

Хав дарчих сэтгэл надад олж өгөөч

***

Болжморын нулимсанд орчлон живчих гээд байхад

Бороо чи ч бас юу ч билээ

***

Тэвчээргүй гэдэг нь

Тэнгэр лүү гарах гээд

Тархиа гашилгаж байх юм

Тэртээ тэргүй

Тэнгэр бидэн дээр

Бууж ирнэ

Нэг их удахгүй…

Ц.Баттуяа 2008.06 сар

***

Өөдөөс чинь харж байгаад

Энэ халуун шоколадыг

Би ганцхан удаа л

Ховх сороод

Шууд залгина

Учир нь бурхан та надад

Яг ийм л амьдралыг

Ганцхан удаа

Туулахыг тушаасан

2008.08.01

Нүдний өмнө үзэг, жижигхэн дэвтэр
Сэтгэл дотор минь эмх замбараагүй үгс
Эвлэж өгөхгүй зовоох рубикийн шоо шиг чамайг
Бодлоосоо авч хаях гэсэн хүсэл минь
Хөл дор хөглөрч, урагш явах замыг минь хэрнэ

Гарт минь, үгс сийлэх хүслээр авалзсан үзэг
Дэрэн дээр минь, мөр холбохыг минь тэсч ядан хүлээх тэмдэглэлийн дэвтэр
Бодол дотроос минь юу юугүй алдуурч
Бусдын өмнө дэлгэгдэхийг хүсэмжлэх үнэн
Тэртээ алсад, далайн элсэн дээр суугаад бодол бодох
Тэнгэрлэг чиний минь санаа алдалтын яруухан чимээ
Хагацаж болохгүй тавилан шиг чамайг
Хайрлаж зүрхлэхгүй хүсэлтэйгээ баглан боогоод
Бидэнд атаархагч бурхадад бэлэг болгон илгээюү
Ц.Баттуяа 2011-10-20

Бодол шиг алсаас чам руу тэмүүлэн гүйж

Бороон дунд тэврэлдэн учралдсан сан

Долоон өнгийн солонгонд шунан дурлаж

Догдлолоо чинийхээ гартай хамт чангаас чангаар атгаад

Солонго хөөж өдөржин гүйсэн сэн

Жаргах нарны туяанд

Жаахан хүүхдийнх шиг харагдах чиний инээдийг

Солонго гэж итгээд олзлон авч

Сайхан дурсамжуудынхаа гүнд

Бүгдээс нууцлан бат цоожилсон сон

Олоон жилийн дараа

Олзолж авсан солонгоо эрээд олсонгүй

Хүүхэд шиг гэнэн, үлгэр шиг дур булаам

Нүдэн дотор минь тэр л чигээрээ урлагдаж үлдсэн

Чиний минь цагаахан инээмсэглэлийн оронд

Чамаас нууж унагасан нулимсны минь хэдэн дусал

Надаас харц буруулан бэргээд

Гэмшингүй бөнжигнөж байнам

Ц.Баттуяа 2012-01-06

Надаас алдуурсан чамайгаа санахдаа

Наргүй өдрийн тэнгэр шиг бүүдийдэг ээ, сэтгэл минь

Намайг орхисон гэгээн дурсамжуудтайгаа хамт

Нарыг бэдрээд зууртаа бүдэрч унадаг аа, хайр минь

Хүүхэд шиг аалинд чинь уярч явснаа бодохдоо

Хүрэн зүрхнийхээ шархыг сэмрээдэг ээ

Сэтгэлээ үе үехэн хөндүүрлүүлж

Чиний зүгт харцаа бэлчээдэг ээ

Гэвч зүрхний минь оргодол чамайгаа үгүйлэхдээ

Гунигаа хэлхэн чамдаа зам тавьж өгвөл

Чи над руу яаран гүйх болов уу?

Хайрыг чинь эмтэлж, сэтгэлийг чинь өвтгөсөн

Хором бүрийнхээ төлөө чамайгаа аргадаж

Чиний төлөө дахин уйлах эрх надад байгаа болов уу?

2011-07-21

http://salkhi-met.blog.banjig.net→

Өөрөөсөө ч огт өөр болсныг минь

Надад битгий хэлээрэй

Өөрт чинь л шунан дурладаг сэтгэлээ

Өрөөлөөс хамгаалан өмгөөлдөг зүрхээ

Өнө мөнхөд найдан хүлээх итгэлээ

Өр зүрхнээс чинь олж авсан очоо

Сэтгэлийг чинь нэвтэлж ширтсэн харцаа

Санаа алдалтаас чинь шүүрч үлдсэн гунигаа

Сэмэрч дуусдаггүй ужигт энэ хайраа

Өөрөөсөө хүртэл нуух гээд

Найз нь хэтэрхий ихээр шаналж байна

Өөрөөсөө хүртэл огт өөр болсныг минь

Надад битгий сануулаарай, хайрт минь

2011-07-25

http://salkhi-met.blog.banjig.net→

Цаг хугацааны далавчин дээр суугаад нисч одсон

Залуу насыг тань гамгүй үрсэндээ тандаа бид өртэй

Хайрлаад, харамлаад хорвоогийн жамаас бултуулж чадаагүй

Хангал насыг тань хайгаад бас л олоогүй явна аа

Алдсан хором бүхнээ нөхөх гэж

Өтөл насыг тань л хайраараа аргамжаад манаж сууна аа

Хавар, намар шиг ээлжлэх баяр, гунигийн салхинаа

Тэвдэж сандран ганхахад минь

Тэвчээр болоод ухааныг минь урладаг алтан гарт таныгаа

Хүүхэд шигээ эвийлэх олоон жилүүдийг

Инээд, нулимс хоёроороо барьцаалан

Ирээдүйгээс гуйн залбирч л явна аа, бид чинь.

2011-08-13

http://salkhi-met.blog.banjig.net→

Нэг их гунигтай наймдугаар сар

Шаагитал асгарахгүй хэрнээ шиврээд л байдаг

Шаналангийн саарал бороонд нь

Урсаж одтолоо зогсоод л баймаар наймдугаар сар

Нэг их айдастай наймдугаар сар

Томоогүйхэн насны минь тавьтаргүй зүрхэн дээр

Огтоос танихгүй чиний нэрийг

Часхийм халуун харцаар цоргиж тамгалсан наймдугаар сар

Нэг их тэмүүлэлтэй наймдугаар сар

Гунигт саран цонхон дээр минь ирж зогсоод

Гээж орхисон гэрэлт дурсамжуудыг минь

Сэтгэл сандаачин нэхээд явж өгдөггүй наймдугаар сар

Орь ганцхан сайхан дурсамжтай наймдугаар сар

Олны олон дундаас чамайг онцолж

Зүрхийг чинь онилж, нүдээрээ сум тавиад

Яг гүнд нь оносон наймдугаар сар

2011-08-16

http://salkhi-met.blog.banjig.net→

***

Намар болохоор

Навч хачин их догдолдог

Гарал нь болсон

Газартайгаа

Гандаж л уулзана гэж бодоод тэр

2010-09-22

***

Нисэх л гэж жигүүртэй заяасан насны минь

Нимгэн далийг бүтэлгүй дурлал ч гэмтээж чадахгүй

Талын ганц бялзуухайн танилхан жиргээ л

Танхилхан далавчийг минь тасдчихаж магад аа

2005 он

***

Даль нь гэмтсэн үрээ сахиад

Тээр жил

Нутагт минь өвөлжсөн хос тогоруу

Хаврыг үзээ болов уу, яагаа бол??? 

2010-05-25

http://salkhi-met.blog.banjig.net →

Өглөө сэртэл

Өдөн дэрэн дээр ганц зурвас…

“Хайрт минь, урьд шөнө би

Чинийхээ урууланд гараа зөөлхөн хүргэлээ

Гал авалзаж байна

Чинийхээ гарыг зөөлхөн атгалаа

Халуу шатаж байна

Чинийхээ зүрхийг зөөлхөн тэмтэрлээ

Хүйт оргиж байна,

Баяртай” гэжээ

2008 он

http://salkhi-met.blog.banjig.net →

Нулимсаа би ус буцалгагчинд хийгээд

Хугас болтол нь буцалгав

Зүрхээ би цайны ууранд хийгээд

Нунтаг болтол нь нүдэв

Буцалгасан нулимсандаа түүнээ хийгээд

Дусал болтол нь хандлав

Амраг минь одоо үүнийг уу

Бусдад алдсан зүрхийг чинь

Буцааж авчирна аа гэж найдья

2008.06.05

http://salkhi-met.blog.banjig.net→

Цасан өмсгөлтэй танхил бүсгүйн

Цэв цэнхэр нүдэн дотор

Дугираг хөх тэнгэрийн

Шигтгээ болсон

Дусал цагаан оддоос

Ижий сүү асгарнам

Тэртээ алсад, замын нөгөө үзүүрт

Жаргаж буй наран мэт

Час улаан нөмрөгтэй

Дурлалын ханхүү

Цааш харан зогсоод

Бүхий ертөнцийг мартнам...

Бүсгүйн зөөлөн уруулыг

Зүггүй салхин хэдэнтээ таалаад

Хоолой даваагүй үгсийг нь

Залуугийн чихнээ өртөөлөн шивнэнэ

Урван одогч залуугийн

Час халуун зүрхнээс

Хүрэн улаан шүүрс ялгарч

Үдэн бясалгагч бүсгүйн зүг

Эрчлэн хийснэм...

2011-11-24

Уярмаар зөөлөн

Энэ хаврын эхний бороо

Дусал бүртэй нь хамт

Ганцаардлын тухай хамгийн сайхан мэдрэмж

Сэтгэл рүү минь шиврэх

Энэ бороо мэдээж анхных биш

Хавар болгоныг угтан шивэрдэг

Энэ бороон дунд

Надад бэлэглэсэн чиний анхны үнсэлт

Уруулд минь чиний уруул хүрэх тэр л агшинд

Ганцаардалтайгаа бат зууралдах хамгийн таатай мэдрэмж

Сэтгэл рүү цутгах

Энэ үнсэлт мэдээж сүүлчийнх ч биш

2010-03-05

***

Гандсан тэр навчны

Хувь заяаг нь салхи л мэддэг болохоор

Хөөрхий тэр навч

Салхи болохыг хүсдэг

Хэзээ ч очихыг хүсээгүй газартаа

Салхинд эрхшээгдэн очсныхоо дараа л

Салхи биш, навч болон мэндэлсэндээ

Хязгааргүй ихээр баярладаг

2009-12-13

IMG_1101.jpg
Хэмжээс: 600x536 177k
Сэтгэгдэл: 0
Үзсэн: 4199

zam-072.JPG
Хэмжээс: 600x450 153k
Сэтгэгдэл: 0
Үзсэн: 3522

uvl-034.JPG
Хэмжээс: 600x450 119k
Сэтгэгдэл: 0
Үзсэн: 3667