BIIRBEH.MN
Та нэвтрээгүй байна Нэвтрэх
Харагдах горим:
Үсгийн хэмжээ:
☕
Бийрбэхэд кофе авч өгөх
21 жилийн түүхийг дэмжих (QPay)
5,000₮~

9907-6364 | info@biirbeh.mn

© Biirbeh.MN - Бүх эрх хуулиар хамгаалагдсан

Шүлэг

Бусад 		 Шүлэг: Ж.Рэнчинмядаг : Зүрхний уяа
Оруулсан Bataka on 2026-11-06 13:06:38 (38 уншсан)


Шүүдэр сондрох өвсөн шугуй
Шөнийн талдаа өдөн нөмрөг
Ханийн болзоонд намайг дуудсан
Хайрын шивнээ үндэс сэрээнээ

Дахилт: 
Замбуулинд учрахгүй байх аргагүй ээ
Залуу нас дурлалын дуу минь

Энх мэндийн дуун уяраатай
Эргэх хорвоо үүрдийн минь заяа
Нялх цэцэгсийн хатан бүүвэйтэй
Нандин дэлхий хайрын өлгий

Дахилт:  
Замбуулинд учрахгүй байх аргагүй ээ
Залуу нас дурлалын дуу минь
Ганцхан мөчид холдохын аргагүй ээ
Гал халуун зүрхний уяа

Насан туршийн амьдийн жаргал
Наран аялах алсын цараатай
Үрээ бүүвэйлж өсгөх чөлөөгөөр
Үйлс тэтгэн үр чинь дэлгэрээстэй

Дахилт 2 удаа: 
Замбуулинд учрахгүй байх аргагүй ээ
Залуу нас дурлалын дуу минь
Ганцхан мөчид холдохын аргагүй ээ
Гал халуун зүрхний уяа 


( Дэлгэрэнгүй... | 0 | Шүлэг | Бусад | )

Лхагвасүрэн 	Бавуугийн	 Шүлэг: Бавуугийн Лхагвасүрэн : Зүүдэн бороо
Оруулсан Bataka on 2026-11-06 10:12:55 (49 уншсан)


Үг: Б. Лхагвасүрэн
Ая: Б. Магсаржав

Халин халин нисээд ирсэн шувуу
Харзны усанд элгээ жиндээн ганганах юм
Харын хар нүдэн чамайгаа
Харж л суух минь хэзээ л юм бол доо

Нэмэн нэмэн дүүрэх шинийн саран
Нэг л зөөлхөн дээшээгээ дэгдэн мандах юм
Сайны дээд энхрий чамайгаа
Санаж л явах минь заяа юм даа

Нойрон дунд зүсрэх зүүдэн бороо
Норсон дэр хацрыг минь хайран өнчрөөх юм
Тооныг нь элбэж өргөсөн гэртээ
Тормойж суух чинь хэзээ л юм бол доо


( Дэлгэрэнгүй... | 0 | Шүлэг | Лхагвасүрэн Бавуугийн | )

Бусад 		 Шүлэг: Дахиад
Оруулсан Хүн on 2026-11-06 03:08:32 (39 уншсан)

Бодь ч хамаагүй амьдрал дах бие махбод руу минь
Бага ч болов дахиад нүд рүү минь харвал би
Ер бусын гэмээр орчлон ертөнцийн төв болсон мэт, дараа нь
Ероолгүй хадан хавцал руу ангал уруу унасан мэт, дуусах байх
Шалтгаан ба үр дагавраас зөвхөн чамайг хайна
Шалтаг нь сэтгэл дагавар нь санаашрал
Гэрэлтэж харуулдаг байсан өнгөө дахиад нэг үзүүлээч надад
Гэм нь, харагддаг байсан ч үзэгдэхгүй нь надад
Угшил утгууд маань зөрөлддөг болохоор
Өнгө будгууд маань эсрэгцдэг болохоор
Зөөлрүүлдэг эгшиг нь чи байсан ч
Заримдаг угшил би гээчихсэн байх
Гүн ухаантан биш ч гэлээ
Гүн ойлгохыг хичээх ч гэлээ
Хувь тавилангийн утсыг холбох гэсэн ч
Хүслийн хязгаар төөрөгт таслагдан
Гүн увидаст оршихуйг чинь
Гүнээсээ би хүсэн
Шулуудах бодлууд минь хэтэрч
Чулуудах үйлдлүүд минь ихсэж
Саяхан оргилд хүрч байсан ч
Чөдөрлөгдчихсөн шиг болчихож
Самуунт бодлын жам уу
Самгардсан үйлдлийн шан уу
Ай, алдаа мунхаг хоёрыг минь умартаад ганц л удаа
Дахиад нэг өнгөө надад харуулаач
Ахиад нэг дурсамжаа уудлуулаач
Дэлбээ бүр толбоо ч бүү үлдээ
Ахиад надад бүгдийг нэг үзэглээч
Надад намайг нэг сануулаач.


( Дэлгэрэнгүй... | 0 | Шүлэг | Бусад | )

Бусад 		 Шүлэг: Отгон-эрдэнэ
Оруулсан Bilguuntuvshinjargal on 2026-11-02 00:17:22 (113 уншсан)

Орчлон ертөнц тоонот тэнгэрийн дор 
Орь ганцаар зүрхэнд минь орших
Тэнгэрийн хишиг зүрхний эгшиг
Тэвэрт багтах ганцхан од
Гийх дулаан нарны илч
Гүйгүүл алдуул сэтгэлийн эзэн минь
Олны дундаас зүрхийг минь булааж
Оволзон долгилтол булиглуулан
Найрын дуу шиг цангинасан
Нандин насны учрал минь
Ээвэр газрын урьд яаран
Элэг зүрхэнд минь нахиалсан
Ранжин шар яргуй минь
Дэрвэх сэтгэлийн хуйлраанд
Эргэж тойроод л өнгөрсөн
Эгэлгүй нэгэн тохиол минь
Наддаа чи минь ахиад нэг ирвэл
Нар тэвэрсэн шиг л явна даа би
Энгэртээ намайг ахиад нэг тэвэрвэл 
Энэ л зүрхэнд хайрлуулахыг хүснэ дээ би

Билгүүнтүвшинжаргал

( Дэлгэрэнгүй... | 0 | Шүлэг | Бусад | )

Бусад 		 Шүлэг: Тэмүүлэн : Цэцэгсийн хүрээлэн
Оруулсан Temuulen on 2026-11-01 20:50:13 (128 уншсан)

Цэцэгс цэцэгсийн дундаа

Чи хамгийн төгс нь юм

Анхилам сайхан үнэрийг тань

Юутай ч хоршуулж хэлэмгүй

Сарны гэрэл мэт төрөхийг чинь

Юугаар ч зүйрлүүлж барамгүй

Тийм л төгс юм байна

Бурхан хамгийн сайханыг

Хамгийн гоёмсог нь гэж хэлүүлэхийн тулд

Бүрэнхий шөнийн тэнгэрт

Гялалзан дэлбээлэх ганцхан үүргийг өгчээ

Олон хоногийн өнгөнд бус

Ганцхан агшны гайхамшигт амьдрах гэж

Оддын гэрэл дор намуухан дэлбээлэн

Орчлонгийн нууцыг өгүүлнэ гээд

Харах нүдэнд нь үлдээж хоцроох биш

Хорвоогийн сайхныг зүрхэнд нь мэдрүүлэхээр

Энэ хорвоод ирсэн мэт 

Oxypetalum Epiphyllum чи

Сарны гэрэлд цагаан дөл мэт асаж

Ногоон навчисын дундаас од мэт гялалзан

Төгс төгөлдөрийн чимээгүй дүр төрх болсон юм



( Дэлгэрэнгүй... | 0 | Шүлэг | Бусад | )

Бусад 		 Шүлэг: Тэмүүлэн : Миний дурласан бүсгүй
Оруулсан Temuulen on 2026-11-01 20:47:36 (124 уншсан)

Миний дурласан бүсгүй тэнгэрийн дагина

Оддын гэрлийг өөртөө шингээж

Огторгуйн харанхуйд илчээ цацраасан

Үзэхийн хязгаарыг чамаас л би харсан

Үгүйлэхийн жаргалыг чи минь надад өгсөн

Чамайг би бодолдоо биш зүрхэндээ санадаг

Тийм болохоор ч цаасан дээр биш зүрхэндээ

Цацарсан илчээр чинь би бэх дусаан

Шингээсэн гэрлэнд чинь би цаас урлана

Шүлэг болгон зүрхэндээ тэрлэсэн

Үг болгон ханандаа сийлсэн

Хэрвээ хайр минь бэх болон уусах юм бол

Хэзээ ч дуусахгүй гээд чамайг бичнэ

Хэрвээ зүрх минь цаас болох юм бол

Хуудас бүртээ чиний нэрийг чинь үлдээнэ

Тиймээс миний дурласан бүсгүй

Тэнгэрийн дагина хэвээрээ байг

Хүрч чадахгүй алсад байсан ч

Харанхуй шөнийн минь гэрэл нь чи байг

Учир нь би чамайг

Бодолдоо биш — зүрхэндээ хадгалсан

Бэхэндээ биш — цусандаа шингээсэн

Бичигтээ биш

— амьдралдаа сийлсэн.



( Дэлгэрэнгүй... | 0 | Шүлэг | Бусад | )

Бусад 		 Шүлэг: Эрхбаяр Баярцогт : Бодол
Оруулсан Эрхбаяр on 2026-10-31 09:34:49 (128 уншсан)

Байгаль дэлхий агийн үнэрт ариусаад
Бодлын жигүүрт хайрын шүлэг зүүгднэм
Бурхан чамайг хүмүүний ертөнцөд бэлэглэхдээ
Буруу цагт миний дэргэд унагачихжээ

Аадрын дусалд хайрын дуу чимээлээд
Амьдралыг би чамтай төсөөлж алхдаг
Аригал халиун буга согоогоо харан урамдах шиг
Анир зүүдэн орчлонг би чиний харцаар аргадах юм.


( Дэлгэрэнгүй... | 0 | Шүлэг | Бусад | )

Үржинханд 	Э	 Шүлэг: Энхбаатарын ҮРЖИНХАНД : СҮНСНИЙ БАЯР
Оруулсан Bataka on 2026-10-31 09:29:57 (127 уншсан)

Хоолоовин ч гэнэ үү, Хаалуубин ч гэнэ үү😆 😜       Ахан дүүс минь, энэ чинь Монголын баяр биш шүү!     Бүү хөөрцөглөцгөө😊🫣🪷

СҮНСНИЙ БАЯР 

"Сүнсний баяр" гэж ирээд
Сүрхий хөөрцөглөх юм даа
Сүүдэртэй хүмүүн атлаа
Сүгний дүрд хувилчихаад
Сүүмийсэн бүрэнхий үдшээр
Сүүтийсэн ноорхой жаалууд
Сүнс зайлам царайгаар
Үүд хаалгаар эргүүлдэнэ
Үзээрийн хүйтэн дүрээр
Үр хүүхдээ хувиргачихаад
Буянтай Монгол хүмүүн та
Юу бодож суудаг юм бол?
Атга тавхан чихрээр
Алдрай үрс минь дутаа юу?
Ад чөтгөрийн баяраар
Монгол наадгай дутаа юу?
Алаг чихрээ харамлаагүй ээ
Ашдын бэлгэдлээ бодном.
Амны хишгээ асгахгүй ээ
Үндэс угсаагаа хүндэлнэм.
Бор халзан туулайхан гэж
Бяцхан үрсээ энхрийлдэгсэн
Бусдын соёлыг гүн хүндэтгэвч
Уламжлалт соёлоо эвдэмгүйсэн.
Салбадайн дүр төрхүүд
Сайхан санагдахгүй байна 
Ёр шүгэлсэн "Halloween"
Ерөөлгүй санагдаад байна
Хаан дээдсийн Монгол үрс 
Хаалга тогшиж гуйлгачламгүй
Өндөр заяат Монголчууд минь
Уужим ухаандаа тунгаана биз ээ
Бэлгэдэлт эрхэм Монголчууд минь
Билиг оюундаа болгооно буй за.
      Энхбаатарын ҮРЖИНХАНД
              2026.10.30@highlight


( Дэлгэрэнгүй... | 0 | Шүлэг | Үржинханд Э | )

Бусад 		 Шүлэг: Анук : Сэтгэлийн үг
Оруулсан Anukk on 2026-10-29 19:59:49 (149 уншсан)

Алтан нарны туяанд алаг нүд нь гэрэлтээд
Алдрай бяцхан зүрхийг минь догдлуулсан чиний харц
Асан гялалзан гэрэлтүүлэх лааны бяцхан тусгалд
Анхны хайр чамдаа зориулан энэ шүлгээ бичье.

Сэтгэлийн үгээ чамдаа
Хайраараа уянгалуулан бичье
Сэтгэлийн минь үгсийг чи минь
Хайраар бялхаж уншаарай.

Сэтгэлийн үгс чамайг
Мөртөөр буулгаж бичье
Сэтгэлийн минь эзэн хайртыг минь
Инээдээр гялбуулан бялхуулаарай.



( Дэлгэрэнгүй... | 0 | Шүлэг | Бусад | )

Үржинханд 	Э	 Шүлэг: Э.Үржинханд : УРЛАГААР "ХҮН" БОЛОХУЙ
Оруулсан Bataka on 2026-10-29 11:45:57 (138 уншсан)

Үр минь, чамайгаа заавал дуучин болгох гэсэнгүй
Өсөж дэвшин, биеэ зөв авч яваасай гэж,
Үгээ товч, тодорхой, эмх цэгцтэй ярьж,
Өөрийгөө зөв илэрхийлж сураасай гэж,
Өөр олон талаараа хөгжин, дэлгэрч,
Өөрийн үнэ цэнийг мэдэрч яваасай гэж
Урлагийн замд дагуулдаг юм шүү.

Үр минь, чамайгаа заавал бүжигчин болгох гэсэнгүй

Үелзэн долгилох мэт эвсэлтэй байгаасай гэж,
Өхөөрдөм бие чинь өв тэгш бойжиж,
Өргөн дэлхийдээ сэтгэл тэнүүн алхаж,
Ямар ч үед сэтгэлийн хаттай байг гэж
Үнэнч шударга, аливаад эерэг хандаасай гэж
Урлагийн ертөнцөөр аялуулдаг юм шүү.

Үр минь, чамайгаа өөртөө тааруулж, хүслээ гүйцээх гэсэнгүй ээ.


( Дэлгэрэнгүй... | 0 | Шүлэг | Үржинханд Э | )

Үржинханд 	Э	 Шүлэг: Э.Үржинханд : НАМАР ХЭМЭЭХ ЯРУУ НАЙРАГ 🍂
Оруулсан Bataka on 2026-10-29 11:42:09 (111 уншсан)


Навчин бороо газраар зулаад л
Нялх цасан сормуусанд уусаад л
Наран ичингүйрч үүлэнд шургаад 
Намайг уярааж шүлэг бичүүлээд
Намар гэдэг шүлгээ шүлэг

Салаа моддын мөчир шарлаад л
Сэвшээ салхи мөрөөр илбээд л
Дотроос нэгэн нууцыг хэлээд
Дуртай дуу аманд аялагдаад
Намар гэмээнэ шүлгээ шүлэг



( Дэлгэрэнгүй... | 0 | Шүлэг | Үржинханд Э | )

Бусад 		 Шүлэг: У.Баатарчулуун : Санаашрал
Оруулсан Baatarchuluun on 2026-10-28 10:40:00 (128 уншсан)

Дүрдээ ороогүй жүжигчин шиг хөөсөрсөн хүмүүстэй орчлонд
Дүр эсгэхийн төлөө гашуун дарс сөгнөв
Дүрийг чинь ч санахгүй тийм хуурамч ертөнцөд
Түр очиж үзчихээд бүүр хүрээд ирлээ

Нүүрэн дээр буух цасан сэтгэл дулаасган хайлна
Нүцгэрсэн тэр модод л даанч гунигтай харагдах юм
Нүүгээд одох өдөр хоног бүрийн цаанаас
Нүдийг чинь санахад яг л ийм харцтай байсан даа

Ороод л байгаа цасан сэтгэл хичнээн бүлээсгэвч
Олдохгүй зовлонт жаргал зүрх хайрахыг мэдрэв
Ойрхон байхыг хүсэвч хол баймаар байна
Одоо ингээд л боллоо үнэндээ цааш тэсэхгүй нь

Манант зэврүүн өдрүүд нэг л шөнө арилж
Маргаашийн наран мандахад энэ модод ч инээмсэглэнэ дээ
Магадгүй тэгэхэд зүгээр л сайн сайхныг хүсээд
Маргаашийн нарыг модод шиг инээмсэглэн угтмаар байна

У.Баатарчулуун


( Дэлгэрэнгүй... | 0 | Шүлэг | Бусад | )

Шүлэг 		 Шүлэг: У.Баатарчулуун : Нэр үгүй
Оруулсан Baatarchuluun on 2026-10-28 10:34:24 (149 уншсан)

Ганцаардлын өрөөнд цонхны хөшиг нээгдэж харагдадгүй
Гадаах халуун хүйтэнг тэнд огт анзаардаггүй
Бороо орвол харин цонхоо дэлгээд зогсчихдог
Бодлогширонгуй нэг хүн  тийм өрөөнд амьдардаг

Урьд өнгөрсндөө харамсах тухай боддоггүй
Ухаангүй дурлах итгэл одоо ч байгаадаа гайхширдаггүй
Уншсан номондоо автаад хэдэн ч өдрөөр гэгэлздэг
Уйлж чаддаггүй нэг хүн хаа ч юм амьдардаг

Зүүдэнд ирэх болсон хэн нэгний төлөө
Зүрхээ зүсэгдтэл бичлээ ч хэн ч олж уншихгүй
Зүрх тархиныхаа зөрчилөөс өөрийгөө олж хардаг
Зүгээр биш нэг хүн энэ ертөнцөд амьдардаг

У.Баатарчулуун



( Дэлгэрэнгүй... | 0 | Шүлэг | Шүлэг | )

Шүлэг 		 Шүлэг: Б.Отгонбаян : Дутуу төрсөн сэтгэл
Оруулсан Отгонбаян on 2026-10-26 09:26:21 (127 уншсан)

Дутуу төрсөн сэтгэл
Дуулаагүй дуугаа дотроо
Дуугүйхэн аялж гэнэ
Дурайх цагаан төрхийг нь
Дурсамжиндаа тээж гэнэ

Дэврэх учиргүй сэтгэл нь
Дэндүү холыг зорьж гэнэ
Дэргэд нь очоогүй атлаа
Дэлхий нь түүнээр дүүрч гэнэ

Дээгүүр нисэх хун шувуу
Дэнжийн салхинд ганхаж гэнэ
Дэргэдүүр нь өнгөрөхдөө
Дэндүү удаан харж гэнэ

Дун цагаан далавчаа
Дуугүйхэн дэлгэж нисээд
Дутуу үлдсэн сэтгэлээ
Дундын тэнгэрт нууж гэнэ

Дурлал гэдгийг мэдээгүй ч
Дотроо нэгийг хүлээж гэнэ
Дурсахын төдийд баярладаг
Дуугүй зүрхтэй болж гэнэ

Харах бүрд нь хавар болж
Харанхуй нь гэрэлтэж гэнэ
Хажууд нь байгаагүй ч гэсэн
Хаашаа ч юм дөхөж гэнэ

Хэлж зүрхлээгүй үгс нь
Хэн ч сонсолгүй үлдэж гэнэ
Хэзээ нэгэн цагт уулзах мэт
Хүлээлт нь уртсаж гэнэ

Тэгээд өнөөх хун шувуу
Тэнгэрийн хаяа руу нисэж гэнэ
Тэврэхээс өмнө холдсон нэгнийг
Тэндээ ч дотроосоо хайж гэнэ

Дурлаж үзээгүй хун шувуу
Дун цагаан нэгнийг санаж гэнэ
Дутуу төрсөн тэр сэтгэлээ
Дуугүйхэн насан туршдаа тээж гэнэ

Бямбасүрэнгийн Отгонбаян


( Дэлгэрэнгүй... | 0 | Шүлэг | Шүлэг | )

Шүлэг 		 Шүлэг: Ганболдын Ганбагана : Хайрлахуй
Оруулсан Ганбагана on 2026-10-25 15:42:47 (203 уншсан)

Намираад л, эмзэглээд л, энэрээд л 

Энэ сэтгэлийн аясыг олж чамайг би хайрлаад л

Нар, салхи, бороо, цэцэгс намайг үргэлж тойрохыг зүүд л гэж санахдаа 

Хайр гэдэг

Нандин, гэгээн, дулаан болж чи минь намайг ивээх

Энэ бүх агшин, агшны доторх агшнууд ч 

Агшин тэлж, тэлж агшсаар хаанаас ч юм бэ ундраад л байхыг хэлэх 

Агшин хормууд урссаар надад арван жил ч үл хүрэлцэхийг 

Магад арван зуун ч хангалттай бишийг ухаарч

Ахин дахин шунан дурлах бал бурмын амт юм шүү  

Хайрлахуй гэдгийг би чинийхээ 

Алганы хээ бүрийг андахгүй таних 

Хайрлахуй гэдэг би чинийхээ 

Үсний долгион бүрийг 

Андуурахгүй болтлоо илбэх юм шүү 

Хайрлахуй гэдэг би чинийхээ 

Нүдний хувирал, хөмсөг, уруулын хөдөлгөөн

Уран нарийн бэлхүүсний гунхах маяг гэдгийг таних л гэж 

Адайрч бүхний өөдөөс сөрж зогсох л юм шүү 

Алс тэнгэрээс би зөвхөн үг гуйж 

Тэр бүх үгсийг чинийхээ өлмийд дэвсэх 

Дэвссэн үгс минь цэцэг болж 

Алхах замд нь гэгээ л болоосой гэж хүсэх юм шүү.



( Дэлгэрэнгүй... | 0 | Шүлэг | Шүлэг | )

Батзаяа 	Б	 Шүлэг: Б. Батзаяа : Тамхиа татаж дуусгаад
Оруулсан Bataka on 2026-10-20 22:33:06 (9322 уншсан)



Ганцхан тамхи татчихаад л чамаас би бүрмөсөн явлаа
Ганцаардал гуниг хоёроо чамаас буцааж авчихаад
Танихгүй залуугийн сэтгэлд дурлалаа итгэж үлдээгээд
Тамхиа татаж дуусчихаад л би бүрмөсөн явлаа



( Дэлгэрэнгүй... | 0 | Шүлэг | Батзаяа Б | )

Шүлэг 		 Шүлэг: Мөнхбаатрын Тэлмэн : Ирээдүйн дурлалдаа
Оруулсан Тэлмэн on 2026-10-20 22:28:27 (126 уншсан)

Ахиад ганц дурлаж болох уу?
Асах зүрхэнд минь түймэр тавьж
Арсалдах сэтгэлд гэгээ татах шиг
Ахиад би ганц л дурлая

Харууссан сэтгэлээ би
Хармаандаа эвхэж хийгээд
Хатсан нулимсаа би
Хаврын бороонд угаачихаад

Хэнзлэх цэцгийн дэлбээ шиг
Хацар гоо бүсгүйг хайрлая
Хархан нүдэндээ галтай
Хонгор чамд дурлая

Дүүрэн сар шиг төрхтэй
Даруу төлөв нэгэнд дурлая
Харцандаа гэгээтэй эгэл нэгнийг
Хайрлаж нандигнаж би дурлая

Асах цогны дулааныг нь яана
Ахих насны богиныг нь яана
Айлын охины хөөрхнийг нь яана
Асгарах хүслийн хязгаарыг яана

Зулай дээрээс дусах
Зуны бороотой үдэш
Зүүдэлж сэрсэн чамд
Зүрхэлж ганц дурлая

Аяа би энэ амьдралаас ганцхан дурлал хүсье

Мөнхбаатрын Тэлмэн


( Дэлгэрэнгүй... | 0 | Шүлэг | Шүлэг | )

Сүрэнжав 	Шарав	 Шүлэг: Шаравын Сүрэнжав : Тэнгэрийн хүү
Оруулсан Bataka on 2026-10-20 09:44:55 (255389 уншсан)


Би тэнгэрийн хүү та нарын дунд ирсэн юм
Газрын охинтой гэрлэж нарны аяганаас цай уусан
Гашуун дарснаас хиртэж ганихарлын орон дээр хөрвөөж үзсэн
Цагаан цасан дээрээс будрахад хөөцөлдөн эрхэлж
Уулс сандайлан үүлсээс үүлсэд дүүжин хийж нааддаг байсан
Цагийн бороо тэнгэрээс асгарахад хөхрөн баясч
Утас дамжих шиг усан ширхэгээр нь авиран гарч
Оддыг сондор болгон хэлхэж цэцгийн толгойд зүүж өгч явсан
Би тэнгэрийн хүү та нарын дунд ирсэн юм



( Дэлгэрэнгүй... | 19 | Шүлэг | Сүрэнжав Шарав | )

Шүлэг 		 Шүлэг: Н.Марал-Үжин : Намрын гуниг
Оруулсан Марал-Үжин on 2026-10-19 21:31:27 (150 уншсан)

Навчис хийсэх намрын салхинд
Намайг санах хүн бий болов уу?
Нартай өдрүүд хүртэл гунигтай санагдаж,
Нам гүмхэн сэтгэл минь чамайг үгүйлнэ.

Шаргал навчис газарт буух бүрд,
Шаналах зүрх минь чимээгүй өвдөнө.
Хамтдаа алхаж байсан тэр л замаар,
Хайртай байсан дурсамж минь дахиад л хөтөлнө.

Намар гэдэг хагацлын улирал юм уу,
Нандин бүхнийг дурсахын нэр юм уу?
Салхи минь чи түүнд хэлээд өгөөч,
Санадаг хэвээрээ гэдгийг минь шивнээд өгөөч.

Намар нэг л өдөр дуусаж одовч,
Надаас чам руу тэмүүлэх сэтгэл минь л дуусахгүй байх 

Н.Марал-Үжин


( Дэлгэрэнгүй... | 0 | Шүлэг | Шүлэг | )

Шүлэг 		 Шүлэг: А.Мөнхбат: Танхил хонгор морь минь
Оруулсан Bataka on 2026-10-19 15:17:31 (3816 уншсан)

Ергөж хатирахыг нь харах юм бол
Ерөө, Хараа халгих шиг
Явдал давхилыг нь ажих юм бол
Янзага дүүлэн дэгдэх шиг

Тавилан заяа нь тэнгэрийнх гэмээр
Танхил хонгор морь минь дээ



( Дэлгэрэнгүй... | 0 | Шүлэг | Шүлэг | )

☕ Кофе авч өгөх