Салхин зүгээс сэнгэнэх хүжис нь
Сэндэн модны сайхан үнэрт үр юм
Сая жилээсээ ч дундрашгүй хайрын
Саран гэрэлт Сэндэргоогийн үрс юм

Баруухан уулын хяраас гялалзах нь
Баг цэцэгт алтан харганын үр юм
Буман жилээсээ ч дундрашгүй хайрын
Бадмын гэрэлт Сэндэргоогийн үрс юм

Зэсэн шаргал талын энгэр цээжинд
Зэлмүүхэн ургадаг нь зээргэнийн үр юм
Зуунаас зуунд жаргалыг зэндмэлсэн
Зэлгээхэн уургатай Харалдайн үрс юм

Хөвөх үүл асар тэнгэрийн хэвлийд нь
Хайрлам нандин үр нь гэгээн наран юм
Хөл тоос нь эрт түүхээсээ ариламгүй
Хөхчүүхэн мэнгэтэй Харалдайн үрс юм

Балбар Энхбат 2015.10.20

( Сэтгэгдэл [] | Шүлэг | Оноо: 0/0 | Энхбат Балбар )

Би шархаллаа, шаналлаа, уйллаа

Цонхоор харагдах тэнгэрлэг оршихуй

Цочтол нижгэнэх цоглог аяз

Цайвалзан үзэгдэх гэгээн ертөнц

Цөм надаар тохуурхаад байх шиг

Би баярлалаа, хөөрлөө, инээлээ

Бүүдийн цонхоор харагдах бүрсгэр ертөнц

Бөртийн жаргах гэж буй наран

Бүлээн амьсгалтай хатаж буй ургамал

Бүгд надад эцсийн хүчээрээ урам хайрлах шиг

Сонин юм даа, сонин юм

Хэдий солонго татсан байлаа ч

Хиртсэн л бол сэтгэл минь түүнийг

Хэрхэвч солонго гэж хардаггүй юм байна

Хэзээ ч тэгж харахыг хүсдэггүй юм байна

Гайхам юм даа, гайхам юм

Жихүүдэс хүргэм харанхуй нөмөрсөн ч

Жаргалтай л байвал сэтгэл минь түүнээс

Жийрхэж ер дөлдөггүй юм байна

Жишүү харахыг ч боддоггүй юм байна

Харамсмаар юм даа, харамсмаар юм

Хүний сэтгэл тийм л хийсвэр гэдгийг

Хэдхээн өдрийн өмнө ч болов мэдсэнсэн бол

Хээрийн намуун салхины шуранхайг

Хааяахан будрах цасны шивнээг

Эгэл түмний сэтгэлийн уянгыг

Энэ ертөнцийн ямархан сайхныг

Хором бүрт мэдэрч тэнгэр өөд тэмүүлсэн

Хосгүй үзэсгэлэнт хүн цэцэг болох байж

Б.Батцэцэг

Их л санах юм даа, ижийгээ
Элгээ эмтэртэл нулимсаа эгшүүлэн байж санах юм
Сэтгэлээ сэмэртэл ижий таныхаа дүрийг эрж
Сар, нартай ижилсэн байж санах юм

Уйлахгүй шүү, учиртай юм гэсэн гэж
Урсах нулимсаа барин тавин санах юм
Ухаангүй аашилчих вий гэсэндээ
Уйтан зүрхээ зүсэгдтэл хатамжлан байж санах юм

Гэхдээ охин чинь гундахгүй ээ
Ганцхан таныхаа үргэлжлэл болохоор
Урьд урьдахаасаа илүү гэрэлтэнэ
Улам өндөрт дүрэлзэн асна

Ижий таныхаа хүсэл, захиас
Энэ биеийнхээ мөрөөдөл тэмүүлэлийн илэрхийлэл
Амжилт бүтээлийн гэрэлт суварга босгохоор охин чинь
Алхам алхмаар урагшилж л явна

Томоогүй загнасан үйлдэл бүртээ
Тоомжиргүй хэлсэн үг бүртээ харуусаж
Шүүрс алдсан сэтгэлийн хэдэн мөртөөрөө
Шүлгэн сондор хэлхэж тандаа барья

Ядмагхан хэдэн мөрт зориулахаас өөр шидгүй
Үр намайгаа уучилж өршөө
Яараад л явчихсан ижий танаасаа охин чинь
Үнэн сэтгэлийн угаас хүлцэл өчье

Б.Батцэцэг

Ховд сумын Батсуурь арслан 

Баруун аймгийн Батсуурь арслан
Баяр наадмын магнай арслан
Баруун зүүн хоёр жигүүрийг
Байс гээд л тэргүүлэн гардаг

Бөхөд байвал зохих шинжүүд
Бүрэн дүүрэн бүрдсэн арслан
Бусгаа хавираа даацтай арслан

Борвидож тахимдан дайрдаг арслан 
Барьмал  юм шиг хатуу арслан
Баяд дөрвөдийн хүчит арслан
Бушуу түргэн барилдаан ч арслан

Барьцнаас дамжих угсраа мэхтэй 
Багаасаа сурсан дархан мэхтэй
Барилдаж  байхдаа хурц шийдэмгий
Барилцаад авахад  зүрх чичирмээр

Бар арслангийн  шинжтэй  хүчтэн 
Баавгайн тэнхээтэй хүчит арслан
Бариагүй азарга шиг омголон бөх
Баруун зүүнгүй гуяддаг арслан 

Баруун монголын  хайртай  бөх
Цэлийсэн цэнхэр увс нуурын
Цэцэг дэлгэрсэн цэнхэр талын
Цэл ногоон алдарт дэвжээнээс

Цойлон тодорсон залуу арслан
Цацаа цалигиа  хурдтай арслан
Цочио нь гарсан  хийгүй арслан
Цээжиндээ бяртай Батсуурь арслан

Цолондоо хүрсэн данагар арслан
Хамаг монголын  ямар ч  хүчтэнтэй
Хав дөрвөлжин  золгоод  барилдах
Халирч байгаагүй эрэмгий дайчин
Ховд сумын  Батсуурь арслан

2015 он 10-р сарын 18-н
Сартуул Б.Улаанхүү
Багануур хот

Хан хөхийн ханагар арслан

Хавчиг соёолон шиг эртэй арслан

Халхын наадмын түрүү үзүүртэй

Халзан тохоотой хүчирхэг арслан

Дэвж явах нь дэвжээ дүүргэсэн

Дээшээ хийморьтой босоо арслан

Дөрвөн мөчиндөө тэгш тэнхээтэй

Дархан хутгаатай  даам арслан

Дээлэн дээрээ зодгоо бүсэлчихээд

Дэвжээн дээрээ алхаж харагдах нь

Долоон харынхаа шийрийг хатаасан 

Дөрвөн ойрадын  даалуу арслан

Дугтарч байх нь тасдаад  байх шиг

Дальдар ч ухармаар хүчтэй арслан

Дээгүүр давуулан гуядаж байгаа нь

Дэндсэн гэмээр хүчирхэг арслан

Аатай эртэй  аралтай арслан

Ааархаж  хөөрдөггүй залуу арслан

Амласан бөхөө басаж байгаагүй

Аядуу зөөлөн ухаантай арслан

Аавын удмаас залгаж  ирсэн

Аралтай бяртай удмын хүчтэн

Арслан цолоо дахин батлах

Аваргын энтэй хүчирхэг арслан

Баяр наадмын одтой арслан

Баядын хошууны  бурхан арслан

Багаасаа барилдсан удмын бөх

Бүрэнтөгс арслан Давстын бөхөө

Увс аймгийн  хүчтэн дотроос

Уул шиг түшигтэй сайхан арслан

Ургаа хад шиг  хатуу арслан

Улсын арслан Давст сумынхаа

2015он 10сарын 19 нд


Сартуул Б.Улаанхүү
Багануур хот

Тээр жилийн нэг өвөл сар надтай ханьсаж

Тэвдүүхэн сэтгэлдээн саранд дурлаж

Тэнгэрт даатгасан хүслээ шивнэж билээ

Тэгэхэд тэр сар ямар гайхамшигтай байсан

Гэтэл тэр сар над дээр биш

Гэрэлт ертөнцийг гийгүүлэх гэж биш

Гэгээ цацруулсаар замхран одход

Тэр нэгэн өвлийн тэргэл сарыг

Тэнгэрт би дахин олж хараагүй юмдаа...

Б.Жавхлантөгс

Салхин исгэрээ шувуудын ганганаа сүлэлдсэн
Саруул ухаанд бодол торинуулж үүрсүүлсэн
Дураар наадах хөгнийн хөх бялзуухай эрчилдсэн
Дурдмал сайхан эгшигэн хөгтэй миний нутгийн уулс минь

Хөгдөрч өвгөрсөн нүүрний татмагших нугалааг үзээд
Хөвүүн үрээ танихдаа униартах талаа дэвсдэг нутаг минь
Зээрийн хондлой шиг нутгаасаа үргэсэн төрмүүд үрээ
Зэгэстэй шар дэрсээрээ шавхуурдаж нэг өршөөдөгсөөн тал минь

Ариун усныхаа долгионд бүүвэйн эгшигтэй
Амгалан их талдаа агийн үнэртэй
Аав ээжийн минь өлмий дарсан мөртэй
Алтан нутаг минь амар энхийн өлгий

Өргөн говийн өвгөн хонгор
Өвгөдөөс дамжсан гүр адуу
Өндөр шилийн өмнөөс уралдаж
Өндгөн багаасаа танигдсан хүлэг
Цагаан усаар бэлчээртэй азарга
Цамнаж давхисан омголон азарга
Цахилах гөрөөс шиг хурдан адгуус
Цалигсан хурдай хонгор азарга
Дааган цагаасаа давхисан хүлэг
Дарлаж уралдсан даалуу азарга
Дашдэмбэрлийн  уяаны  унага
Долоо түрүүлсэн цуутай ажнай
Гүү сайтай сүргийн удамтай
Гүр адууны удмын угшилтай
Гараа барианд хурдтай азарга
Галан шаргал говийн ажнай
Сайхан говийн хонгор азарга
Салхи эсгэрүүлсэн хурдтай буян
Соёолон насандаа эд хурдлаж
Соёрхол хүртсэн ардаг ажнай
Тал нутгийн таантай говийн
Тахийн сүрэгтэй төрөл нэгтэй
Хурааж болдоггүй хулангийн цустай
Хумбан туурайтны бүрдмэл хүлэг
Хатан  говийн шигшмэлд багтсан
Хурдтай нутгийн хувьтай азарга
Хонгор азарга шилийн унага аа

2015  10сарын 11нд

Сартуул Б.Улаанхүү

Багануур хот

Ав хөөсөн азарган чоно шиг
Агуу хурдтай сүрдмээр азарга
Аравгар хээрийн аатай давхил шиг
Арвалзаж байдаг аяган туурт

Адуучин хүнд ховорхон заяах
Аархаж бардмаар алтан туурт
Азийн тэнгэр араасаа дагуулсан
Арслан цээжтэй аварга азарга

Адууны зэл нь унагаар дүүрсэн
Ацтай шонд нь аргамагууд цугласан
Араасаа дагуулах ариван хурдтай
Ачтай буянтай хүлгийн манлай



Алтан жолоо тогтмол өргөөстэй
Айраг шингэсэн алхан толгойтой
Арьсандаа биш ясандаа хурдтай
Арслан дэлтэй чонон бор азарга

Унаган цагаасаа уралдаж сурсан
Уралдах гараанд унаачаа сугартал
Урагшаа хурдтай шуургалан гардаг
Удмын гараатай унаган ажнай

Сул эргэсэн ч сурсан зангаараа
Салхи хагалан тархинд гардаг
Сувдан хөлсөө сул асгаруулсаар
Суларсан чигээрээ барианд ордог

Халхын хурднуутай хамт уралдахаар
Хавиргаа зурайтал сойгдсон хүлэг
Хаана ч уралдсан хаамал ажнай
Хангайн амьтны дүртэй азарга

2015 он 9-р сарын 10-нд

Сартуул Б.Улаанхүү

Багануур хот

Эрвэн нүдний дэрвэн харцанд
Энхрий сэтгэл уясаад байх чинь.
Хөнгөн алхаа донж намбанд
Хүсэл сэтгэл минь татагдаад байх чинь.
Дэвүүр шувууд хавар цагаар дуулалдан ирэхэд
Дэнсэлж догдлоод зүрхний гуниг бороо шиг сувдрав.
Сэвэлзүүр салхи сэвлэгээр наадан аальгүйтэн эрхлэхэд
Сэрэмж алдууран түүний зүг хүсэл минь урвав.
Эрвэн эрвэн харцны чинь гэгээнд
Ээнэгшинхэн дасмаар байна.
Дэрвэн дэрвэн харцных нь гэгээнд
Дэгжин гоёмсог бүжмээр байна.
Хувилгаан цагаан гараас нь
Хундагагүй дарс уумаар байна.
Хулгайн хорвоог хайраар уучилж
Хууль цаазгүй жаргамаар байна.
Хөнгөн алхаа, ихэмсэг дүр нь
Хөвсөлзөх зүрхнээ тодхон байна.
Хүслэн хяслан алаглах хорвоод
Хүмүүний хайр л агуу байна.
Эрвэн дэрвэн харцны чинь гэгээнд
Эрххэн охин шиг дуулмаар байна.
Элэгнээс сэмрэх сүүн гунигаа
Энгэрт чинь асгаж уйлмаар байна.

Ххх

Өмнөдэлгэрийн залууг
Өөртөө би дурлуулмаар.
Өнгө аялгуу тансаг
Амрагийн шүлэг уншуулмаар.
Дөлгөөн бор нүдэнд нь
Сэмхэн гунигаа нуумаар.
Дүүрэн цагаан инээмсэглэлд нь
Арван наймт шиг баясмаар.
Надтай хамт бүжиглүүлж
Намба алдуулж цэнгүүлмээр.
Найрын сөн түшүүлж
Нам согтдогийг нь болиулмаар.

Зүггүй зүггүй бодлууд
Зүү шиг хатгаад байх чинь
Зүүн зүгийн салхи ийм л саваагүй юм уу даа.
Зүүсгэл дэгжин хөвүүний
Зүрхийг нь гижигдэхээ болъё доо.
Зүс зүсээ андахгүй
Зүгээр л найзууд явъя даа.

Даруухан зан надад зохихгүй гэнэ.
Давилуун ааш минь надад гоёл болдог гэнэ ээ.
Гунигаа нуусан харц минь наддаа л гоёл.
Дуу алдсан инээд минь ч бас нэгэн гоёл.
Хэнгэрэг дэлдсэн дуу хоолой минь
Хэн хүнд байхгүй гоёл оо.
Буян далласан мэнгэ минь гоёл.
Бурханаас надад заяасан авьяас минь гоёл.
Байгаль ээжээс заяасан очмог цочмог араншин
Орчлонд намайг чимсэн үнэлшгүй гоёл мөн.
Томъёолж хэлэхийн аргагүй миний л араншин
Тооцоолж бодохын хэрэггүй миний л гоёл оо.
Цэв цэнхэр эсвэл ягаан
Цэг, цэг... миний л араншин

Ххх

Намир намир бороонд нь
Шүхрээн гээж алхмаар.
Насны намбаа гээж
Гэзгээн задгайлж гунхмаар.
Нарны цацраанд сувдрах
Болор мөнгөн дуслыг нь
Насны гунигаа мартан
Хацрынхаа хонхорхойд шигтгэж
Надад зовлон үгүй гэж
Ертөнцөөр дүүрэн хашгирмаар.

Шивэр шивэр бороонд нь
Сэтгэлээ ариусгаж алхмаар.
Сэргэлэн  нүдтийнхээ харцыг
Алган дээрээ бөмбөрүүлж,
Сэрмүүхэн талын цэцгэн дунд
Завилж суугаад
Бурханы бадаг хэлхэхсэн …

Хөнгөн гуниг сэтгэл эзэмдэнэ ээ.
Бодлын мөнгөн бороо шивэрсхийгээд дэндүү.
Борхон зүрх минь цээжиндээ догдлол дүүрэн эндүү.
Болзоо холын газраас чамдаа яараад андуу.
Эндүү андуу хорвоогийн наранд
Элээх тавилан учралаа зөвтгөж
Дуулан хайлан уярч л явна даа.
Дутууг гүйцээх хүсэлтэй л нас минь,
Залуу нас минь.
Цэцгийн эмзэг дэлбээ салхинд ганхаад аядуу.
Цэрвүү алсаас чи минь бодолд ургаад андуу.
Наран солонгорч зүрхэнд хайр бялхаагаад дэндүү.
Нажидтай энэ л хорвоо тавилан зөрүүлээд эндүү.
Эндүү андуу хорвоогийн наранд
Элээх тавилан учралаа зөвтгөж
Дуулан хайлан уярч л явна даа.
Дутууг гүйцээх хүсэлтэй л нас минь,
Залуу нас минь.
Нойрмог сарны гэгээ, бүдэг бадаг санаашрал,
Нойтон сормуус сувдран гэгэлгэн ай туниатай.
Хүний тавилан өнгийсөн андуу заяа хөөрхий.
Хүслээн дагаж хайрласан сэтгэл ээ хөөрхий.
Эндүү андуу хорвоогийн наранд
Элээх тавилан учралаа зөвтгөж
Дуулан хайлан уярч л явна даа.
Дутууг гүйцээх хүсэлтэй л нас минь,
Залуу нас минь.

Хорвоогийн гунигийг зүрхэнд юүлсэн учрал
Хоёрлох сэтгэлийн үзүүрт хайр үерлүүлсэн тавилан
Хослохын ерөөлөөс зөрж, үйлээр хөтөлсөн заяа
Холоос ч, ойроос ч эрэхийн хэрэггүй зүрхэнд минь байдаг
Хорин нэгтэй амраг надад байдаг.

Хайр байгаа болохоор л …

Харцанд минь чи ойрхон байна.
Хашгирахад дуу минь чамд хүрэхээр байна.
Харайгаад л чиний энгэрт зүүгдэж болохоор байна.
Хайрт минь чи надад дэндүү ойрхон байна.
Дэндүү ойрхон байгаа болохоор чинь
Сэтгэлийнхээ галыг өрдөж болохгүй байна.
Тэгвэл шатчихна, тавилан гуниглана.
Дэргэдээс чинь холдож чадахгүй байгаа болохоор л
Сэмхэн дотроо шаналж хуурай гунигаар мэгшинэ.
Уйлвал чи мэдчихнэ, сэтгэл эмтэрнэ.

Хайртай гэж
Хад чулуу доргитол хашгирмаар байвч
Би тэвчинэ.
Хашгирсан ч зүрхэн дотроо хашгирна.
Хорвоо хайраар бялхаж л байдаг.
Хайрыг дагаад нулимс урсаж л байдаг.
Хайр байгаа болохоор
Хүмүүс учирч, бас хагацдаг.
Хайртай учирсан болохоор л
Хүн төрж, бас үхдэг.
Хайр байгаа болохоор л…

Ххх

Аяар аяархан цасан будраад
Анир хөндөж бодол сандаахад
Алчуурын дэрвээнд он цаг алсарч
Ай завгүйхэн явсаар нас нэмж одно.
Амрагаан санаж ганцаар алхахад
Ариухан цас аргадаж ханьсана.
Амрагтаан яарч гэгэлзэнхэн алхахад
Алиман сар чиний зүгт хөтөлнө.
Тэнгэр нь хүртэл мэддэг
Тийм тавилантай хүмүүс дээ, чи бидэн.
Тэнгэр нь хүртэл таалдаг
Тэргэл ерөөлтөй хүмүүс дээ, бидэн.
Аяар аяархан цасан будраад,
Анир хөндөж бодол гэгэлзүүлээд
Амрагтаан тэмүүлэн яарсаар явтал
Алчуурын дэрвээнд он цаг хийсчихэж.
Алган дээрээс минь
Шинэ оны наран мандаж байна.
Ххх

Их санахын цагаан талд адуу янцгаана.
Ижилсэхийн цагаан тивд  аядуухан яарна.
Хувь ерөөл байвал төөрөөд ч болов ирнэ дээ, миний амраг.
Хувилгаан сарны гэрэлд  шүлгээ шадалж хүлээнэ ээ, би чинь.
Их яарлын цагаан салхинд ямархан аялгуу жимбүүрдэнэ вэ?
Их хүслийн цагаан үйлээр ямархан тавилан урланам бэ?
Тавилан хэрвээ байвал
Тамд ч болов уулзана даа, амрагтайгаа...

Тэнгэр аргадсан эрх жаргалын өргөө
Тэвчээр алдарсан энхэр хүслийн өглөө
Тэр бидний учралын драм тоглодог
Нов ногоохон,
Ногоолин сүм.
Гоо хонгор сарыг атаархуулан байж,
Гоё хүүхэн одыг төөрүүлэн байж,
Гуа ертөнцийн тансгийг бүтээн туурвиж
Тэр бидний жаргадаг
Ногоолин сүм.
Тэнгэрийн доор хайраар босгосон
Нандин сүм.
Нов ногоохон,
Ногоолин сүм-
Амрагийн дуэльд дуудсан
Болор одон жингэнээтэй.
Амьдралын далайд төөрүүлсэн
Бодрол хайрын шивнээтэй.
Тэргэл сарны гэгээг
Дарс шиг шимсэн хөлчүүрхэлтэй.
Тэнэглэлийн халуун галд
Шатаж эндэхийн эмгэнэлтэй.
Тэр сүмд би
Жаргал дүүрч очдог.
Тэр сүмээс би
Зовлон үүрч гардаг.
Тэглээ гээд гомддоггүй
Тийм амттай зовлонгийн үрийг
Тэр сүмд л тарьж болдог.
Тэр бидний жаргадаг ногоолин сүм.
Тэнгэрийн доор хайраар босгосон
Ариуслын сүм -Ногоолин сүм.
ххх

Миний задгайлсан
Гэзэгний үзүүрт
Сувдан дусал бөнжигнөнө.
Хэний гуниг вэ?
-Тэнгэрийн гуниг!

Миний хантайрсан
Хүлгийн нуруунд
Чийгтэж хононо.
Хэний гуниг вэ?
Орчлонгийн гуниг аа…

Ххх

Улаан сарны гэгээнд
Улаан модод дуулалдана. 
Улаан мододтой гудамжаар
Улаан машинтай давхина.
Улаан дарс уугаад
Улаан хөлчүү явхад
Улаан сормуустай залуу
Улаан болзоонд урина.

Дүрийг чинь мартах гэж өөрийгөө би зовоодоггүй.
Дүүмэдхэн байлаа ч, уулзахаас би айдаггүй.
Цадиггүй хонгор аалинд чинь дэндүү би хайртай.
Цайлган сэтгэлийн гэгээн энхрийлэлтэй.
Ямархан үйлээр чамтай учирснаа би мэдэхгүй.
Яах гэж чамд дурласнаа би мэдэхгүй.

Дөлгөөхөн харцыг чинь санахын ихээр санана.
Дүрвэсэн алсаас хүсэхийн ихээр хүснэ.
Сар хоног улирах тоолон
Жаргасан өдрүүдээ бодолдоо хүрдэлж,
Сайхан чамтай учран дассан
Жамын төгсгөлийг үл хүснэм.

Ххх

Наалинхай хоёр эрэвгэр нүд
Намба донж, насны гэнэн
Аль алинд нь сэтгэл сөгчих
Аальгүй нас минь үгүй болж дээ.
Арван хоёр насны
Алтан зөрүү харшилдаад
Амраглахын орчлонд
Дүү минь чи хожимджээ.

Гоёхон үзэг гоо сайхны зураач юм.
Сэтгэл минь цэв цэнхэр тэнгэр юм.
Сэрэл минь сэв сэвхэн салхин юм.
Сэрэмж минь тэв тэнгэрийн бөөлөл юм.
Сайхан төрх минь зэрэглээ юм.
Санаж гуних минь манан юм.
Сартай үдшийн болзоонд
Таяг тулсан эмгэн очдоггүй.
Сайхан залуу нас минь л миний гоо сайхан
Цаг зуурын гоёл минь юм.
Цаг мөнхийн гоёл минь харин
Сэтгэл минь юм.
Сэтгэл минь өөрөө
Цөвтөж үгүйршгүй гоо сайхан минь юм.

Гучин хэдэн нас намбаан гээж сээхэлзээд
Гуниг үерлэсэн гудамжны төгсгөлд
Гэрийн халаадтайгаа зогсоно.
Гурван бээр, дөрвөн бээр,
Олон, олон бээрийн чанадаас ирэх
Хэн нэгнийг хүлээнэ.
Гурван сар, дөрвөн сар, таван сар дууссан байна.
Гуа цагаахан хус өвгөрсөн мэт нүцгэн үзэгдээд…
Энэ гудамжны замыг бүр хаагаад…
Эргэж ирэхгүйгээр салах ёс гүйцэтгэе үү…

Гуниг минь миний хамгийн хайртай гоёл минь юм шиг,
Нулимс минь миний хайраар хэлхэгдсэн 
Сувдан зүүлт юм шиг,
Гудамж минь- миний дураараа туйлах араншин минь.
Ганцаардал минь -миний ирээдүй тольдох ухаарал минь…

Гучин хэдэн нас намбаан гээж
Гуниг үерлэсэн гудамжаар
Даашинзгүй алхаж болно.
Хаах замгүй, хайх мөргүй
Миний гудамж-Гунигийн гудамж…

2010.05.14

Саахалт айлын ах
Гучин найман настай.
Сайхан хар нүд нь
Сониуч содон харцтай.
Хар хамбан дээлний
Ембүү мөнгөн товчинд
Хасын сарны туяа ойж буусан учралтай.
Хаврын дунд сарын тэргэл гийсэн үдшээр
Халуухан зүрхэс уяралдуулж
Харцаараа ярьсан шивнээтэй.

Хот айлын ах
Гучин найман настай.
Хонгор сэтгэл уясаах
Хайрын гэгээн совинтой.
Хав дөрвөлжин цээжинд нь
Барсын хүч оршоостой.
Хат суусан ухаанд нь
Хаадын ухаан шаглаастай.
Хайлан цагаан сэтгэлд нь
Хайрлахын үнэн хөглөөстөй.
Ханийн заяа тэгшилсэн
Тавилангийн сайханд ивээлтэй.

Айлын сайхан ах
Гучин найман настай.
Алаг нүдний харцанд нь
Охидын сэтгэл дэглээстэй.
Амраг ханиа хуурахгүй
Итгэл гэдэг  цайзтай.
Айлын сайхан ах
Гучин найман настай…

Бал амтагдсан жаргалын
Төгсөшгүй үргэлжлэл болж
Батцэцэг ургасан.
Бага л жаалхан амрагийнхаа
Бялхсан хайрын сэтгэлээс
Гал цэцэг болж бадарсан.
Бартаа цөвтэй амьдралын
Түмэн нугачаан дундаас
Үхэшгүй мөнхийн цагаан уул
цэцэг болж дэлгэрсэн.
Төөрсөн төөргийн тавиланг
Зөөллөж ургасан бүсгүй цэцэг.
Түвшин хонгор сэтгэлд
Нөмөр бараадаж ургасан бэр цэцэг.
Янжинлхамын энгэрт
Эгшиг анирдаж ургасан
Шидэт цэцэг.
Янз гоо дүрээрээ
Бусдын зүрхэнд гэрэлтэх
Домог цэцэг.
Явж одсон цаг хугацааны
Солонго цэцэг.
Энхэр үрсдээ сүүн хайр ивэлгэсэн
Ижий цэцэг.
Эхнэр заяандаа
Ханийн хайр сүлдэлсэн
Эмзэг цэцэг.
Монголын хоймор завилах
Хаан заяа тэтгэгч
Хатан цэцэг.
Мохошгүй хийморь сэргээх
Хүн заяаны
Амин цэцэг.
Баяр гунигийн дундаас
Бадамлаж дэлбээлсэн
Амьд цэцэг.
Балрашгүй дуусашгүй амьдралын үргэлжлэл
БАТЦЭЦЭГ  -бөх цэцэг ээ.

Хос тогоруу
Хэмжээс: 600x514 98k
Сэтгэгдэл: 0
Үзсэн: 7320

zam-066.JPG
Хэмжээс: 600x450 57k
Сэтгэгдэл: 0
Үзсэн: 4167

YolHad_20.JPG
Хэмжээс: 700x525 90k
Сэтгэгдэл: 0
Үзсэн: 3910