( 2-р хэсэг )

- Тийм газар анх удаа шагайх гэж буй миний бие хирдээ л Дэлгэрмаагаас дутахааргүй дэгжин бүсгүйн дүрд хувирах гэж хамгийн загварлагт тооцдог хувцсаа өмсөөд яг хэлсэн цагт нь очлоо. Хаалга сахиж зогсох бадриун биетэй хамгаалагчдын дэргэдүүр өнгөрөөд өнгө өнгийн гэрэл гялбасан цэнгээний газар хүмүүсийн яриа, хөгжим холилдсон нэг их шуугиан дундуур явж орлоо. Загвар өмсөгчөөс дутахааргүй туялзаж намилзсан зөөгч бүсгүйчүүд дундаас инээд алдсаар зорьж ирсэн Дэлгэрмааг би бараг л танисангүй. Намайг дагуулж явсаар нэг ширээнд хүлээж байхыг сануулаад явж одох нь тэр. Түүний ажилтай танилцахаар ирсэн би тарах цаг нь болтол ганцаараа суух байсан ч тэгсэнгүй ээ. Төдөлгүй Дэлгэрмаа ширээн дээр хундага дарс тавьчихаад явж одлоо. Дараа нь ойролцоогоор долоо найман насаар ах байрын шонхор хамартай, хүнхэр нүдтэй франц залуутай танилцуулснаар анх удаа гадаад найзтай болов. Энэ газар үнэхээр сонин юм, зөөгч нь ширээнд суугаад үйлчлүүлэгчтэйгээ ярилцаж болдог газрыг би энд л харлаа. Түүнийг Дэвид гэх бөгөөд мөнөөх зоогийн газрын эзэн байв. Ингээд сарын дараа гэхэд бид хамт "покер" гэгчийг тоглодог боллоо. Тоглоомын умгар өрөөнд тамхины утаа нүүгэлтэх бөгөөд зүгээр хараад сууж байгаа бид хоёрт Дэвид яагаад ч юм байсхийгээд л мөнгө өгнө. Хүйтэн хөлс асгарч, гар чичирмээр их мөнгийг зүгээр л халаасанд минь хийгээд нүдээ ирмэх Дэвидээс би хичнээн айдаг гэх вэ. Харин Дэлгэрмаа огт эмзэглэх шинжгүй. Гоё үсээ мөрөн дээгүүрээ хаялан инээгээд л, урт хумсаа гялалзуулаад хэнэг ч үгүй тамхиа сорж сууна. Нэг удаа тийнхүү тоглож дуусахад нэлээд их мөнгө хожсон Дэвидийн найз Майк гэх залуу намайг хүргэж өгөв. Хүний газар байгаа хүн эх орондоо суугаа намайг гэрт минь хүргэж өгөхөд цаанаа л сонин санагдана. Майк монголоор, англиар маш сайн ярих бөгөөд монгол эхнэр авах бодолтойгоо хэллээ. Надад англи хэл зааж өгмөөр байна гэнэ, хэл усгүй би гэдэг хүн үнэхээр их ичив. Дэлгэрмаагийн гадаад хэлний авъяасыг өөрийн эрхгүй биширсэн би тэр мөчөөс хойш залхуурлыг хуга таягдаад хичээлдээ шамдаж эхэлсэн билээ. Бидний нөхөрлөл улам зузаарахын хирээр Дэлгэрмаа ч өмсөх хувцас, үйл хөдлөл гээд бүх зүйлд минь анхаарал тавьж, миний хувьд англи, солонгос хэлийг сайн сурах үүрэг даалгавар хамгаас чухал болов. Жилийн дараа гэхэд сургуульдаа хамгийн гойд сурлагатанаар шалгарч билээ. Харин Дэлгэрмаа Дэвидтэй хамт Франц улсыг зорьсон юм. Энэ хугацаанд хэлээ чамгүй хичээж сурсных хэд хэдэн найзуудтай ч болов. Түүний дотор покер тоглоомчид дундаа хамгийн алдартай, толгой цохидог Чүнхи гэх солонгостой бусдаас илүү дотнослоо. Дөчин таван настай тэр хүн наснаасаа залуу жавхаалаг харагддаг бөгөөд гучин таван настай гэхэд нь хүн бүр эргэлзэлгүй итгэнэ. Харин оюутан солилцооны журмаар Солонгос улсад хүрэлцэн ирэхдээ энэ хүнийг л дагаж гарсан юм. Монгол улсаас ирсэн шилдэг оюутан, угтаа бол хайртай хүнээ дагаж ирсэн Жаргал миний сэтгэл аз жаргалтай байлаа. Сургалтын төлбөр, өмсөх хувцаснаас эхлээд бүх зүйлд огтхон ч санаа зовох шаардлагагүй бөгөөд энэ тал дээр Чүнхи яг л ид шидтэн шиг санагдана. Найз нөхөд дундаа над шиг элбэг хангалуун хүн үгүй. Бүгд л хүрээлэн тойрдог байсан ч удалгүй солонгосын луу баячуудын нэгэнтэй хамтран амьдрах болсон минь хамаг зовлонгийн үүдийг нээнэ гэж хэн мэдэх билээ. Амьдралдаа гурван ч эхнэр авч байсан энэ хүн "тоглоно" гээд л гараад явах бөгөөд ханхай эзгүй байшиндаа орхичихоод бүтэн сараар ч хамаагүй сураг тасрана. Хүний газар ирээд нэг мэдэхнээ бүтэн жилийг ардаа орхижээ. Чүнхиг эзгүй хойгуур Дэлгэрмаатай холбогдох гэж хичээвч сураг ажиг үгүй. Харин Майк байнга шахуу мэнд мэдэж, ямархуу байгааг нь асуун санаа тавина. Жаргал өдөр ирэх тусам ганцаардан гуниж төрсөн гэрээ өөрийн эрхгүй үгүйлэн санана. Бүүдийсэн тэнгэр ширтэн санааширч суусан тэрээр гэнэт сургууль руугаа явмаар санагдаж, харилцууртаа дуут шуудан үлдээгээд гэрээс гарлаа. Дэлхийн өнцөг булан бүрээс ирсэн оюутнууд дунд хэдэн нутаг нэгтнүүд маань мэндийн ч зөрөөгүй хэрнээ Жаргалыг хачирхан харцгаана. Цоргитол харах энэ олон нүдний өмнүүр гэм хийсэн юм шиг арай ядан алхахад өвдөг өөрийн эрхгүй салгалах мэт хэцүү мэдрэмж төрөвч юу ч болоогүй дүр эсгэн явсаар ангидаа орлоо. Хичээлд анхаарахын оронд сургуульдаа ирээгүй нь дээр байж гэж өөрийн эрхгүй бодогдоно. Сонжиж дамшигласан хурц улаан нүднүүд Жаргалыг амар заяа үзүүлсэнгүй. Сэтгэлээ сэргээх гэж гарсан биш, харин ч долоон дордуулаад буцлаа. Ингээд харихаар өнөөх л уйтгар дүүрэн гоёмсог байшин, нэгэн хэвийн аймшигт байдалдаа очно гэхээр ой гутам санагдаж, гудамжаар баахан дэмий алхаж яваад оройтож гэртээ орлоо. Тэгтэл Чүнхи ирчихсэн байна. Долоо хоногийн дараа буцах ёстой хүн гэнэт ирчихсэн байгааг гайхсан Жаргал үүдэнд гутлаа тайлж зогстол бөөн чимээ шуугиан, хэрүүл маргаан болж байгаа нь тодорхой болов. Учрыг нь ч олж амжаагүй байтал ууртай нүдээ эргэлдүүлсэн Чүнхигийн хуучин эхнэр байж байх нь тэр.

(Үргэлжлэл бий)

Э.Үржинханд

zam-069.JPG
Хэмжээс: 600x450 135k
Сэтгэгдэл: 0
Үзсэн: 4490

mongolia2007year-044.JPG
Хэмжээс: 600x450 122k
Сэтгэгдэл: 0
Үзсэн: 3575

B3-026.JPG
Хэмжээс: 437x600 160k
Сэтгэгдэл: 0
Үзсэн: 4399